Геосаясаттың негізгі ұғымдары: геостратегия, кеңістікті бақылау, күштер балансы, геосаясаттың субъектісі, мемлекеттің аумағы, шекарасы және күші, мүдде.
Геостратегия – мемлекеттің халықаралық аренадағы қызметінің бағытын геосаяси тұрғыдан негіздеуі. Геосаясаттың басты категориясы – кеңістіктібақылау. Мемлекет бақылайтын немесе бақылауға ұмтылатын аумақ орталықтың (мемлекеттің) осы аумақты игеруімен, оның байланыстарының даму деңгейімен сипатталады. Мемлекет немесе мемлекеттер одағы бақылайтын кеңістікті геосаяси алаң деп атайды.
Күштер балансы (күштердің тепе-теңдігі) – геосаясаттың негізгі категориясы. КСРО ыдырағаннан кейін әлемдегі күштер балансы өзгерді. Әлем бұрын екіполярлы еді, енді АҚШ оны бірполярлы етуге, бүкіл әлемге өз ойын ережелерін таңуға тырысуда.
Геосаясаттың субъектісі – мемлекет болып табылады. Мемлекеттің пайда болуымен кеңістіктік-аумақтық фактор мемлекеттер арасындағы қатынастарда маңызды рөл атқара бастады. Саясатта «ел» және «мемлекет» деген ұғымдар тең емес. Мемлекет саяси фактор (билік ұйымы), ал ел (жер, аумақ) кеңістік-географиялық фактор.