37. Қоғамдық қауіпсіздік: түсінігі және мазмұны. Қоғамдық қауiпсiздiк – ұлттық қауіпсіздіктің ажырамас бөлігі, ол қоғамның тұтастығы мен тұрақтылығы қамтамасыз етілетін азаматтар өмiрiнiң, денсаулығының және амандығының, қазақстандық қоғамның рухани-имандылық құндылықтарының және әлеуметтік қамсыздандыру жүйесінің нақты әрі ықтимал қауіп-қатерлерден қорғалуының жай-күйі (азаматтардың, қазақстан қоғамының қорғалуының жай-күйі).
Қоғамдық қауіпсіздікмемлекеттік органдардың, ұйымдардың, лауазымды адамдар мен азаматтардың: 1) азаматтардың жеке қауіпсіздігін, олардың құқықтары мен бостандықтарын қамтамасыз ету кепілдіктерін нығайтуға; 2) қазақстандық отаншылдыққа және ұлтаралық келісімге негізделген мемлекеттік идеологияны қалыптастыруға; 3) Қазақстан халқының бірлігін және қоғамда тағаттықтылықты нығайтуға; 4) халықтың табиғи өсімін сақтап тұруға және дағдарысты демографиялық процестерге қарсы іс-қимыл жасау жөнінде уақытылы шаралар қолдануды қамтамасыз етуге; 5) қылмысқа, оның ішінде оның ұйымдасқан нысандарына, сыбайлас жемқорлыққа, терроризмге және экстремизмге қарсы күресті күшейтуге; 6) жұмыссыздықтың өсуін және халықтың тұрмыс деңгейінің төмендеуін тежеуге; 7) халықтың денсаулығы мен имандылығына, Қазақстан халқының гендік қорына қауіп төндіретін нашақорлықтың, уытқұмарлық пен маскүнемдіктің, сондай-ақ басқа да әлеуметтік факторлардың алдын алуға; 8) елдің зияткерлік әлеуетінің төмендеуіне жол бермеуге; 9) қазақстандық қоғамның тарихи, дәстүрлі, рухани және мәдени құндылықтарының сақталуын қамтамасыз етуге; 10) заңсыз көші-қонға қарсы іс-қимылға бағытталған шешімдерімен іс-қимылдарымен қамтамасыз етіледі.
