Дәріс Оқуда қиындықтары бар оқушыларды (дислексия, дисграфия, дискалькулия) инклюзия жағдайында қолдау

2. Дислексиясы бар мектеп жасындағы балаларды қолдау

3. Дисграфияның мектеп жасындағы балаларда кездесуі

4. Дискалькулиясы бар балалармен жүргізілетін жұмыстар

• Оқудағы қиындықтар – баланың оқуындағы белгілі бір проблемаларды, қиындықтарды сипаттайтын жалпы термин. Оқудағы қиындықтар балалардың дамуындағы ерекешіліктерге байланысты әртүрлі болады. Олар қозғалыс дағдыларына (қимыл-қозғалыс, қимыл-қозғалысты үйлестіру, кеңістікте бағдарлану), интеллектуалдық қабілеттерге (қабылдау, есте сақтау, ойлау, зейін, тіл/сөйлеу) әсер етеді. Олар оқу үлгерімінен (оқу, жазу, санау, т.б.), мінез-құлық пен эмоциядан көрініс табады.
• Соның ішінде біз бүгінгі дәрісте балалардың оқудағы қиындықтары (дислексия, дисграфия, дискалькулия), оларды қолдау жолдары жайлы айтатын боламыз.

Дислексиясы бар мектеп жасындағы балаларды қолдау

Дислексия - бұл баланың интеллектуалды қабілеті сақталған, бірақ оқуды үйренуде қиындықтардың туындауы. Дислексия термині алғаш рет 1968 жылы невропатологтар конференциясында сипатталған. Мектеп жасындағы шамамен 5-10 % пайыз білім алушыларда дислексия кездеседі.

Дислексиясы бар бала мәтінді жай, буындап, буындардың орнын ауыстырып оқиды. Ол мәтінде жоқ сөзді ойдан шығаруы, жазылуы ұқсас әріптерді шатастыруы мүмкін, тіпті оқыған нәрсесінің мағынасын түсінбей, оны қайталап айтып беруден қиналады. Дислексия баланың сағат тілін, бағдарды үйренуіне, оқиғаны, кеңістікті басқаларша қабылдауына кесірін тигізеді. Мұндай ауытқуы байқалған бала уақытты, жыл мезгілі мен оның ретін түсінбейді.

Көбінесе мұндай балаларды жалқау деп санайды және нашар бағаланады, олар басқа балаларға қарағанда төмен баға алады . Дислексия - кәсіби түрде емделуі керек, әйтпесе балалар есейген сайын оқуда қиындықтарға тап болады.