Оқулықтағы «Жер сілкінісі кезіндегі іс-әрекеттер» тапсырмасы

Ғимараттың теңселуін сезсеңдер, үдеп келе жатқан гуілдің және сынған әйнектің дыбысын естісеңдер, үрейге берілмеңдер, тез арада ғимараттан шығыңдар. Далада болған кезде ғимараттың жанында тұрмаңдар, ашық алаңға өтіңдер. Егер еріксізден ғимарат ішінде қалып қойсаңдар, қауіпсіз жерге, мәселен, ішкі қабырғаға, бұрышқа, ішкі қабырға ойығына немесе көтергіш тірек астына тұрыңдар. Егер мүмкіндік болса, үстелдің астына тығылыңдар, терезелер мен ауыр жиһаздардың қасынан аулақта болыңдар. Егер үйіндінің астында қалып қойсаңдар, жағдайға қарап, аяқ-қолдарыңды қимылдатып көріңдер. Егер қан кетіп жатса, қолдағы бар құралдармен оны тоқтатуға тырысыңдар. Ыңғайланып алып, денсаулыққа зиян келтіріп тұрған өткір, үшкір қалдықтардан құтылыңдар. Босқа айқайламауға тырысыңдар.

Одан гөрі металдан жасалған бұйыммен плитаны тақылдатқан жақсы. Жақын маңнан адамдардың дауысы естіліп жатса, көмек сұрау керек.