Саяқып қожа ұрпақтарының шежіресі
Жоғарыдағы тарауда Саяқып бабамыздың тарихына қатынасты жиған-терген қоржынымдағы материалдар мен білгендерімді, ауызекі білгендерден естігендерімді баяндадым. Енді осы бабамыздан өсіп-өнген ұрпақтары жөніндегі қолымдағы бар шежіреге қатысты материалдарды назарларыңызға ұсынбақпын. Жалпы алғанда, менің қолыма түскен деректерде Саяқып бабамыз екі рет үйленген көрінеді. Оның ішінде үлкен анамыздан жеті ұлы, ал кіші анамыздан төрт ұлы болыпты, яғни жиыны 11 (он бір) ұлы болған екен. Бірақ, тағы бір деректерде қыздарынан басқа ұлдарының саны 9 (тоғыз) деп көрсетіледі.
Қайсы деректің дұрыс екенін анықтау келешектің еншісіне қалдырылды әзірше. Сонымен үлкен анамыздан: Өзібек, Ханқожа (Ажыбек), Қарақожа, Әждар (Әздер), Сұлтан, Темір, Сәсейіт; ал кіші анамыздан: Төлеген, Бердіқожа, Қылыш, Атахан. Осы есімдері аталған бабаларымыздың ішінен Әждар (Әздер), Темір, Қылыш атты адамдардың аттары еш жерде аталмайды. Бұл бабалар жөніндегі іздестіру жұмыстарым әзірге еш нәтиже бермеді. Білген ағайын болса, осы материалды оқығаннан кейін, хабарласар деген ойдамын. Менің, жеке өзімнің пікірім бойынша, бұл адамдар өмірде болмаған болуы да мүмкін, немесе өмірге келсе де ертерек жастау шағында о дүниелік болып кеткен, болмаса өмірде болғанымен ұрпағы болмағандықтан ұмыт болған ба деп ойлаймын. Сонымен, енді Саяқып бабамыздың ұрпақтарының қолдағы бар шежіресімен таныстыруға көшейін.
Достарыңызбен бөлісу: |
