Тас дәуірі – адамзат баласының тас құралдары өндірген және пайдаланған уақыты.
Тасаттық – құрғақшылық кезінде тәңірден жаңбыр тілеп құрбандық шалу рәсімі.
Тасымал жасау – атпен, түйемен адам немесе жүк тасу кәсіпшілігі.
Ташнау – жуынды су ағызатын құдық. Оны жер астынан қыш құбырмен қала сыртына да шығаратын болған.
Тәлімді егіс – қолдан суарылмайтын егін.
Тәркілеу (конфискация) – қандай да бір дүние-мүлікті мемлекет меншігіне ақсыз пұлсыз тартып алу.
Тәті (диадема) – төбесі мен шүйде тұсы ашық, кішігірім тәж тәрізді әшекейлі баскиім. Тәті негізінен асыл
металдардан жасалған.
Тегін – хан ұрпағы.
Текемет – бетіне түрлі түсті ою-өрнек басылған киіз төсеніш.
Теле – тайпа, көптеген түрік тілдес тайпалардың ортақ атауы.
Темір дәуірі – адамзаттың темірді ойлап тауып, одан құрал жасаған кезеңі.
Темірші – ұста, зергер.
Теология – құдай жайлы ілім.
Терракота – ғимаратқа сән беру үшін қолданылатын шағын көзе кірпіш.
Террор – лаңкестік.
Терімшілік – жинау, теру. Алғашқы адамдар жер бетінде ағаш, бұта басындағы өсіп тұрған әртүрлі жеміс-
жидектерді терді. Жеуге жарамды тамырларды қазып алды. Құстардың жұмыртқасын жинап қорек етті. Бұл
адамдардың ең алғашқы өмір сүру тәсілі, кәсібі болды. Мұндай кәсіп терімшілік деп аталды.
Технология – ғылыми-практикалық негізде шикізатты дайын өнімге айналдыру әдісі, тәсілдерінің жүйесі.
Тоғай – сазды жерлерде өсетін бұта түріндегі шағын тал шоғыры.
Тоқсоба – Қыпшақ бірлестігіне енген тайпа.
Тоныкөк тас жазуы – VІІІ ғасырдағы түрік тайпаларының көне жазба мұрасы.
Топырақ эрозиясы – топырақтың неғұрлым құнарлы қабатының еріген қар суымен немесе нөсер жауынмен
шайылуы, желмен ұшырылуы. Қазақстандағы топырақ эрозиясы тың жерлерді ойластырмай жыртудың, егін
шаруашылығының агротехникалық шараларын сақтамаудың нәтижесінде мүмкін болып, апатты экологиялық
салдарларға әкеп соқты, көптеген егін алқаптары көп жылдарға дейін құнарсыз болып қалды.
