Бағдарламасы бойынша жарық көрді Б. ҚАлмағанбетов: СӘЙГҮлік өмір/ Б. Қалмағанбетов

БИЖАН ҚАЛМАҒАНБЕТОВ 
С
әйгүлік 
өмір
                  
  
 
Алматы
2014

УДД 821.512.122.1
ББК  81.(5 Қаз)-5
Қ 28
Қазақстан Республикасы Мәдениет министрлігі 
«Әдебиеттің әлеуметтік маңызды түрлерін басып шығару» 
бағдарламасы бойынша жарық көрді
Б. ҚАЛМАҒАНБЕТОВ:
 
СӘЙГҮЛІК ӨМІР/
Б. Қалмағанбетов. – 
Алматы: ХанТәңірі, 2014. – 286 бет.
ISBN 978-601-03-0220-4
Бұл  –  ақын  Бижан  Қалмағанбетовтің  екінші  жыр  жинағы. 
Кітаптың негізгі өзегі – адамгершілік, махаббат, өмір жайлы өлеңдер 
болып  табылады.  Автордың  жүрегінен  шыққан  сыршыл  да  нәзік 
туындылары  оқырманды  бей-жай  қалдырмайды,  ойландырады, 
толғандырады. 
                                
УДД 821.512.122.1
ББК  81.(5 Қаз)-5
ISBN 978-601-03-0220-4                        
 ©  Қалмағанбетов Б., 2014
Қ 28

Сәйгүлік өмір
3
         
ӨМІР ҚАЙТА КЕЛМЕЙДІ 
Батырсың ба, алып та бол сен мейлі,
Осы бір ой адамды үнсіз тербейді.
Тіршілік ет өкінбестей өткенге,
Өйткені өмір қайта айналып келмейді.
Баса алмай тұр жүрегің де аптығын,
Біреулердің есіне алып қастығын.
Жиырма бесің тұрмас па еді атойлап,
Кетпесе өтіп жалындаған жастығың.
Өз-өзіңді қояр кейде алаң ғып,
Жасадым деп қай пендеге сараңдық.
Екі-ақ нәрсе тұрады есте өткеннен –
Жасағаның жақсылық пен жамандық!
Бөлмесе де қақпақылдап шеткері,
Өткеніңе боларсың да өкпелі.
Екі-ақ сұрақ тұра қалар көлбеңдеп,
Не тындырдым, неге қолым жетпеді. 
Мынау өмір қызығына құмартып,
Атқарам деп ал мойынға жүк артып.
О дүниедегі жұмақтағы  орыннан,
Тірліктегі кешкен бір күн мың артық!
Азамат боп сүрсең де өмір саналы,
Сен өзіңді қойма ешуақыт жоғары.
Өтер жылдар, қайта айналып келмейді,
Дана халқың берер әділ бағаны. 

4
Бижан Қалмағанбетов
                             АРАБИЯ
Араласаң жер шары үлкен, ғалам кең,
Сүйем бәрін ақыл-оймен, санаммен.
Араб елі,  ассалаумағалайкүм,
Келдім ұшып Ақтөбемнен саған мен! 
Мұсылмандар елін алып аңсарды,
Сөзбен айтып кім бүгінде тауыса алды.
Самалымен көкірегіңді ашып бір,
Абу-Даби құшақ жая қарсы алды.
Құрақ ұшып қажетіңе жаралған,
Қосшылар жүр нұрын төгіп жанардан.
Бұл қаланың алғаш рет іргесі
Екі жарым ғасыр бұрын қаланған.
Мінбелерге алға ұмтылып шығып ап,
Әңгіме емес жалықтырар тым ұзақ.
Астананың баяндасам тарихын,
Құлақ түріп тыңдаңыздар қызық-ақ.
Болмаған соң сескенер жан күдікті,
Қарақұйрық көк шалғында жүріпті. 
Сол байғұс  аңға шыққан қарулы,
Арабтардың назарына ілікті. 
Түз тағысы қалмай ешбір жолынан,
Бұларға да мән бермепті торыған.
Шығанағына тіреліпті  Парсының,
Аңшылар да қалмаған соң соңынан.
Бұлар қайдан тап болды деп табанда,
Кезіпті ұзақ  үрке қарап адамға.

Сәйгүлік өмір
5
Суға түсіп арғы бетке өтіпті,
Беттепті үлкен аясы кең аралға.
Табиғат та ашық екен жанға жай,
Жүріпті олар аңды да оққа байламай.
Суытпастан жорықтарын жалғапты,
Қарақұйрық қайда апарар әрі қарай.
Қуғыншыдан қорқып бір сәт дір етті,
Десек-дағы мейірімді жүректі.
Сол аң, міне, аңшыларды ғажайып,
Қайнар бұлақ басына әкеп тірепті.
Қалайша оны сұлаттым деп мақтанбақ,
Шүріппеге бармапты да қос бармақ.
Алғыс айтып, сыйлапты өмір, ол болса,
Қуаныпты көздерінен жас парлап.
Айтар ойға,  себепші еді жырға да,
Сақталыпты тарихқа бай жылнама.
Осы жерден қаланыпты іргесі
Ал бүгінде аңыз болған бұл қала.
Білмес едік бармасақ, не оқымай,
Тарыдайын кетпеген жұрт шашырай.
Біріккен Араб Әмірлігінің,
Астанасы пайда бопты осылай.
Бәрі есепте: ертең, түс, кеш, саумал шақ,
Тамаша ғой жоқты осылай тауып алсақ.
«Қарақұйрық атасы» екен біздерше,
Абу-Даби арабшадан аударсақ.
Жүзден аса ұлт немесе ұлықпен,
Ортақ мақсат орындауға кіріскен. 
«Бір жеңнен қол, бір жағадан бас шығып»,
Жеті Әмірлік жұдырықтай біріккен.

6
Бижан Қалмағанбетов
Дарығандай кеңшілік пен ырыс-құт,
Тілмен емес қабақпенен ұғыстық.
Бірі болса әлемдегі ыстық қаланың,
Ықыласы да тұрғындардың тым ыстық.
Жан көрмейсің бағытынан адасқан,
Тіршілігі мына өмірге жарасқан.
Қаласында болдың ба сен Корништің, 
Ғимараты көк аспанмен таласқан.
Сонау заман тоқтағандай көші кеп,
Ауызда иман,құран сөзі, өсиет.
Тектен-текке аталмаған бұл аймақ,
«Таяу Шығыс Манхэттені» осы деп.
Құлағың кеп тұрар жасыл шалғынға,
Тұрмаса егер сан жоспарлар  алдыңда.
Зайд Шейхтің, Аль-Хуанның сарайы,
Аль-Вахардың мұнарасына бардың ба?
Бүлк етпейтін бұрқасын мен дауылға,
Ғимарат көп бақ сыйлаған қауымға.
Қайсыбірін тауысайық айтып біз,
Көру керек, түскені осы ауызға. 
Бәрі ақиқат, демен ойды сырлайын,
Таныс сенің оларға іс-ыңғайың.
Алыстағы аңыз болған біз үшін,
Көрдік міне арабтардың Дубайын.
Бурдж Халифа ғимаратына қарасаң,
Құрылыс екен әлемде үлкен орасан.
Биіктігі шақырымға сәл жетпес,
Жүз алпыс үш қатарлы екен санасаң.
Қала елдің қимылымен гүлдемек,
Айтар едік уақыт тығыз мың дерек.

Сәйгүлік өмір
7
Таныстырсақ осы жерде орынды,
Шарджа сауда орталығы бір бөлек.
Көтеріңкі мұнда көңілің, еңсең де,
Үміттерін жалау еткен ертеңге.
Бурдж  Ал-Араб қонақүйі шақырар,
Жеті жұлдызды ұқсайтұғын желкенге.
Мекен дейді бұл аймақты киелі,
Бәрі жақсы жүргізілген жүйелі.
Маң-маң басқан керуендерге таңдандық,
Байғаниннен көрсек те сан түйені.
Танау тесіп, салмаса да мұрындық,
Жуастығына да іштей жылындық.
Тау-тау құмды кешіп өтіп ып-ыстық,
Түйе мініп рахаттана қыдырдық.
Келіп тұр ғой көргенімді ақтарғым,
Ортасында жүргендейсің бақтардың.
Жұта бергің келеді саф ауасын,
Құм арасы кілемдейін көк шалғын.
Бәрі мұнда алдамшы емес, тұрақты,
Таңданғаннан көп қоясың сұрақты.
Өңім бе, әлде түсім бе екен ғажайып,
Мың бір түннің ертегісі сияқты.
Сыйластық бар, қажеті не алтынның,
Өзіме-өзім сабыр деумен сәл тұрдым. 
Кереметі ұмытпапты өткенді,
Дәстүрі ескі сақталыпты халқымның.
Дейсің де үнсіз қызығасың Дубайға,
Өз еліңде жоғы батар шымбайға.
Шіркін бізге қашан жетер бұл бақыт,
Сыр бермейсің бірақ-бірақ мұндайда.

8
Бижан Қалмағанбетов
Ораласың елге мерзім толғанда,
Темір қанат өз жеріңе қонғанда.
Тәтті сезім қоштаспайды сенімен,
Жетем деумен асқақ осы арманға?
Басылады бар қызығың, желігің,
Қоштар деп те ойланасың мені кім.
Қазақстан алға-алға бас деумен,
Ертеңдерге сөнбес шоқтай сенімің.
2 қараша, 2013 жыл.  
Дубай әмірлігі.

Сәйгүлік өмір
9
                               АҒА
Фаяз Харисовичке
Жайдары әркез жүресіз қуаттанып,
Жүзіңізден жүрекке шуақ дарып.
Файыз аға, кетеді көрсем сізді,
Бүкіл башқұрт туысым сияқтанып.
Аға-іні өмірдің сәні дерсіз,
Жазамын деп сырқатты әуресіз.
Профессор, доктор да мәртебелі,
Ақ халаттай жаны аппақ дәрігерсіз!
Тек кәсіпке жұмсалған алау күші,
Сәйгүліктің бәйге алар жараулысы.
Депутатсыз орындап аманатын,
Жұртшылықтың атанған қалаулысы.
Алдыңызда қымсынбай батыл, берік,
Амандасам құшақтап жақын келіп.
Басшы болып талай жыл қатарынан,
Бір ұжымға келесіз ақыл беріп.
Қимасымдай кеткен соң болып ізгі,
Қайта-қайта қысамын қолыңызды.
Шәкірттер де қаншама сізге ұқсап,
Дәрігер болып жалғайтын жолыңызды. 
Көңіл шіркін секілді кейде теңіз,
Қайталанбас керемет күй кешеміз.
Қазақ-башқұрт қашаннан бауыр халық,
Тәржімасыз түсініп, сөйлесеміз.
Көп болғаны жақсы ғой таныс жағы,
Жан емеспіз қол жетпес ғарыштағы.

10
Бижан Қалмағанбетов
Ақтөбе мен Уфаны жол қылайық,
Бола қоймас кедергі,  алыс тағы.
Азаматтық – әр жүрек соны ұқтырсын,
Жаңа жыл ма –мол бақыт болып кірсін.
Файыз аға, тілегім біздерді тек,
Мынау өмір қуанышта жолықтырсын!
2013 жыл. 
Ақтөбе-Уфа

Сәйгүлік өмір
11
                            БІРЛІК
Көрмей кетер біреулер досқа налып,
Әрине ондай қылығын қоштамадық.
Екіншісі тым-тырыс селт етпейді,
Айналасы жатса да отқа оранып.
Келеңсіздік жиі ойға ораларсың,  
Өзімшілдік қай кезде жоғаларсың?
Отан – Ана десек те кейбіреулер,
Күйттеуде әлі өзінің қара басын.
Сұрау қажет дегендей соны менен,
Жүрмес бәрі ынтымақ жолыменен.
Өзекті іске тап болса тайғанақтап,
От көсейді өзгенің қолыменен.
Ұмтылмаңдар болсам деп құнығып бай,
Тірелмеңдер шарасыз тығырыққа-ай.
«Шортан суға, тартпасын аққу көкке»,
Жұмылайық бас қосып жұдырықтай!
Өткен өтті, ол енді оралмайды,
Саналылар демес ем алаңдайды.
Бірлік керек қазаққа, ағайындар,
Іргесі берік елді жау алмайды.
 
Сескендірмес қиындық ырқы бізді,
Жомарт, дарқан, ақ жүрек ұлтымызды.
Сондықтан да ойлайық ертеңдерді,
Болашаққа қол созған жұртымызды!

12
Бижан Қалмағанбетов
                      ТӨРТ  ТАҒАНДАР
Жоқ-жоқ деме бар даусыңмен керілдей,
Тұр ертерек түске дейін керілмей.
Әрекет ет, ізде талмай бақытты,
Абайша айтсақ «еңбек еткін ерінбей!»
                                         * * *    
Баспана  ма, салсаң жұмса бар екпін,
Ойластыр тек жұмысқа не қажеттін.
Ең алдымен суды кіргіз шөл басар,
Шаршағанда сая болар тал еккін.
                                        * * *
Жақсы ісіңмен өнеге етсе ел сені,
Байқалады кісіліктің өлшемі.
Уақыт шіркін ұсынғанда жемісін,
Тесіп шығар ақиқаттың семсері.
                                       * * *
Зейінді жан тез-ақ баурап ортаны,
Жүрсе жаман көлеңкеден қорқады.
Рахмет пен алғысыңды аямай,
Дер кезінде риза еткін баршаны.
                                      * * *
Мініп алып қымбат көлік шетелдік,
Еңбек еттім деп бұлданба өтерлік.
Білетінің бұл өмірде шамалы,
Білмейтінің таудай биік, жетерлік.
                                    * * *
Саналылар күнін мәнді өткізбек,
Қалар есте сол жылдардан шоқ тізбек.

Сәйгүлік өмір
13
Ойыңды асыл жүзеге асыр тіріде,
Бұл өмірді есептеме шексіз деп.
                                       * * *
Ақылды қыз шақырмай-ақ құрбысын,
Таңдамайды жігіттердің жындысын.
Жасы үлкен болса-дағы сүйгені,
Суын құйып, алып берер сүлгісін.
                                      * * *
Саған артық қойылмайды түк талап,
Қонағыңа көрсет пейіл сүттен ақ.
Қабақ шытсаң аз отырып, көп сынар,
Қазы-қарта ұсынсаң да тықпалап.
                                      * * *
Орны бар қатал тәртіп, шешімнің,
Байыпты боп абыройды өсіргін.
Басын иіп келсе алдыңа дұшпаның,
Бәрін де ұмыт, қателігін кешіргін.
                                     * * *
Текке жоймай зымыраған уақытты,
Тапқандай боп жарық жұлдыз, жақұтты.
Қуанғаны қандай жақсы мәз болып,
Жанса еңбегі сол адам ең бақытты!
                                    * * *
Түсінеді ықыласыңды бала да,
Жаңқа болма шығып қалған жағаға.
Еңбегіңді құрмет тұтсын десең жұрт,
Ең алдымен сен оларды бағала.
                                   * * *
Дінді үйреніп, ой-пікір тоқығандай,
Жүрер біреу сәлде орап, шоқынардай.
Парасатты жандарды көп тыңдасаң,
Боласың жақсы кітап оқығандай.

14
Бижан Қалмағанбетов
                                            * * *
Мысалға алсақ әтеш пенен тауықты,
Ажыраспай, құрар бірге сауықты.
«Жол тапқанша жалғыз, көппен адасқын»,
Саяқ жүрген хайуандар да қауіпті.
                                           * * *
Сөзден осы қалса да құлақ тұнып,
Өміріңе жаққайсың шырақ қылып.
Қызғаныштың ермесін қызыл иті,
Махаббаттың тірегі – тұрақтылық!
                                          * * *
Жуан жұдырық, көрсетпе білегіңді,
Одан да айт жастарға тілегіңді.
Садақ оғы жаралар тек тәніңді,
Ал ащы сөз шаншиды жүрегіңді.
                                        * * *
Арамтер боп төкпе босқа күшіңді,
Жайсаңдар да сені жақсы түсінді.
Ескі досың болып шықса дұшпаның,
Сақтан одан, біледі осал тұсыңды.
                                      * * *
Жайың да жоқ кез-келгенге өкпелер,
Шебер ғана түсірер сан кестелер.
Шаршадың ба, сүрінерсің, құларсың,
Адал еңбек хош иісті боп келер.
                                     * * *
Бөтен орта, міне алғашқы таныстық,
Сырға терең десек-дағы қанықтық.
Туған ауыл, сай-саласы, белесі,
Алыстасаң көрінеді бәрі ыстық.
                          

Сәйгүлік өмір
15
                                         * * *
Келсін жасың мейлі қырық, елуге,
Жарнамалап, шықсаң да сан шеруге.
Таза адамды қудаларсың, жетпейді,
Күшің бірақ абыройын төгуге.
                                          * * *
Ақылмен жең үй-ішілік кей дауды,
Балаңды да кетпе ұмытып сыйлауды.
Сонда бәрі қаз-қалпында, тамаша,
Тамақ дайын, төсек-орын жинаулы. 
                                         * * *
Келтірмесін, апатта кім жай табар,
Жұдырықтай жүрегің де шайқалар.
Қысылғанда мен батырмын демес те ол,
Көзсіз ерлік бірақ сонда байқалар.
Баламыз ғой тау мен тасқа ұрындық,
Анамыздың алдына кеп жылындық.
Берсем дейді әйелдерге табиғат,
Ақылдылық, мейірімділік, сұлулық.
                                        * * *
Жылдар өткен сайын бәрі жоғалар,
Жастық шағың, сымбатың да тоналар.
Ақтық демің біткенінше жабысып,
Ақылсыздық қана еріп бара алар.
                                        * * *
Көрінбегін, дей алмаспын үндеме,
Ортақ ой айт, бұрма өзіңнің мүддеңе.
Ақымақ емес залда отырған тыңдарман,
Сахнаға талант, патриот шықсын мінбеге.
                                       * * *
Әкім дейміз азаматты ел сенер,
Бұқараға жан жылуын берсе егер.

16
Бижан Қалмағанбетов
Уәдешіл болса құны бір тиын,
Жетпесе ақылы қиындықты еңсерер.
                                           * * *
Дей алмаймын жарық күн алыс қалды,
Көргенім жоқ мәңгілік данышпанды.
Аң патшасы танытар қауқарсыздық,
Жуасытар ауру арыстанды.
                                           * * *
Асау аттай тулай қалса тосыннан,
Байқатпа оған кейпіңді де шошынған.
Екеуінен сақтан: орға жығар да,
Мықты дұшпан және залым досыңнан.
                                         * * *
Болмаған соң ешкімнен көрер сесі,
Ақтар өзін менмін деп ел еркесі.
Жауыздардың үрейге толы өмірі,
Әзірейілдей көрінер көлеңкесі.
                                       * * *
Сал-серілер ел кезіп, отырмайды,
Бетте әжім бар уақыт та жасырмайды.
Жас, орта, аға буын деп бөлсек те,
Кәрілік те білінбей жақындайды.
             
                                     * * *
Қимылыңды қалт жібермей күзетер,
Пасықтар бар солай оның күні өтер.
Өш алудың ең тәуірі – ұмыту,
Дұшпаныңды жерлеп, бір-ақ күл етер.
                                    * * *
Отағасым деп құдайдай табынған,
Сен де алдында жарыласың ағыңнан.
Көркі әдемі, даусы да әсем көрінер,
Артығы жоқ қалап алған жарыңнан.

Сәйгүлік өмір
17
                                  * * *
Қарапайым, кездесер момын жандар,
Балапанын ерткен қоңыр қаздар.
Көңіл кең ғой тар үйді елемейді,
Махаббаттың нұрына шомылғандар.
             
Зерделі сөз жастарға айтармысың,
Басатын кез желөкпе, сайқал мысын.
Қырық бес жас жиырма бес емес саған,
Алып-ұшып тұрмайсың, байсалдысың.
                                       * * *
Сыйла әкеңді ертеңіңе бақ қонар,
Ойдан шықсаң сенімі де ақталар.
Қаталдығы дәрідейін жұғымды,
Ащысынан тәтті жағы көп болар.
                                            * * *
Жаутаң қағып әйеліне тарылған,
Қолбаладай тек жанынан табылған.
Бара аламаса хайуан дер ем сол еркек,
Көрші ауылға анасына ауырған.
                                            * * *
Бар бақытын Отаны, берер елі,
Ұрпақтары кеңейтер керегені.
Ризамын ғажайып ғұмыр кешкен,
Ерлі-зайыптыларға өнегелі.
          
                                            * * *
Қанша қайсар көрінсе де түр-тұлғаң,
Қарулы әскер тұрмаса артта жыртылған.
Жалғыз қалсаң көрінерсің жабайы,
Парықсыздық жауға жеке ұмтылған. 
                                           * * *
Біреулердің сөзі жетім, ой қасаң,
Деме онымен жеңемін де, шайқасам.

18
Бижан Қалмағанбетов
Сұрақ қойма, ала алмайсың жауабын,
Азаматтың күйзелгенін байқасаң.
                                       * * *
Ілмесең де бәрін бірдей құлаққа,
Мойын бұрғын ақиқатқа бірақ та.
«Аққа құдай жақ» дейді ғой, сондықтан,
Ізгі ниет жол төсейді жұмаққа.
                                      * * *
Соқпаса да сені күміс, алтыннан,
Қыз-келіншек көзін тіксін артыңнан.
Сыншылмыз ғой, абайла дос, ашылар,
Іс-қимылың, сөздеріңнен бар тұлғаң.
                                     * * *
Өзімшіл боп өмірдің ырғағына,
Берілмеген көпшіл боп ұлдарыңа,
Қол соғыңдар еркекпін, әйел емес,
Хайуан да емес, адам боп туғаныма!
                                     * * *
Білмеймін деп өзге тілді мүдірме,
Жігер менен сенім болсын үніңде.
Ол намысың, ол өрісің, айбының,
Қай жерде де сөйле ана тіліңде.
                                   * * *
Ұялды ма, жанарынан шықты ма от,
Жүрегі де кетпес оның түкті боп.
Кешірімшіл бола білгін әрдайым,
Одан сайын қатаясың мықты боп. 
                                 * * *
Жылжыр уақыт таңың атып, күн батты,
Мұның өзі үлкен сынақ тым қатты.
Ақымақтар қиналады, мүжіліп,
Ақылдылар жеңіп шығар сырқатты.

Сәйгүлік өмір
19
                                * * *
Еліңе арнап төгіп маңдай теріңді,
Жолдарға алыс шықсаң буып беліңді.
Дос дегенді жиі естисің, ал бірақ
Сақта есіңе – сирек достар сенімді.
                                          * * *
Адал болсаң жолыңды алла оңғарар,
Ал жаманның ішінде сыз, тоң қалар.
Жағымпазға  тап қылмасын деп тіле,
Жауыздыққа баратын да сол болар.
                                          * * *
Ренжітпей аяла серігіңді,
Суытпа әркез еңбек-көрігіңді.
Тек үрейге берілмей мына өмірде,
Тірі жүрсең жоғалтпа сеніміңді.
                                           * * *
Қойныңда жоқ тығып келген тасың да,
Қаймықпа одан, міні болса айт, жасырма.
Тек қажетін сүзіп алғын ойыңның,
Шешендіктің мәні нағыз осында.
                                          * * *
Өтер баяу, байқалмастан жылжып күн,
Сұрыптайды өмір әлсіз, үздік кім.
Пендеміз ғой қауесеттер тарар мың,
Тек ақ туы жығылмасын шындықтың! 
                                         * * *
Сабақ алдым талай мықты, тектіден,
Аңқау байғұс қажыды әбден ептіден.
Жаны, тәні, даусы сұлу болса егер,
Соны толық азаматым деп білем!
                                

20
Бижан Қалмағанбетов
                                              * * *
Келеді өсіп ұрпақтарың бағында,
Мейірімді бол, қарсы жүзбе ағынға.
Шаш барыңды кедей болып қалмайсың,
Садақа бер, бабаңды еске ал, тарылма! 
                                             * * *
Жарқылдаған алтынды тот шалмайды,
Жарың сондай болса  ойың аспандайды.
Парасаты бар әйел – асыл қазына,
Ері оны таптым деп мақтанбайды.
                                             * * *
Қонақтаса туыс-жегжат саяңда,
Қолғабыс ет, барыңды сал, аянба.
Ескертемін: аулақ жүр сол пәледен,
Дәрі де жоқ қарсы өсек-аяңға. 
                                            * * *
Қызметіңде нақты ашылсын шын кейпің,
Топ ішінде үлгі болып жүргейсің.
Қимылдасаң өкпе айтпайды қарның да,
Бар абырой еңбекте деп білгейсің.
      
                                           * * *
Тілеулестер ертеңіңе сүйінсін,
Дұшпандарың отқа түссін, күйінсін.
Қуат барда жоғары ұста еңсеңді,
Алтын басың ақиқатқа иілсін!
                                          * * *
Кейбіреулер құр сөзбен орақ орса,
Келеді өсіп ғалымдар, дана қанша.
Марапаттап соларды, ардақтайық,
Шетелдерге жаутаңдап қарағанша. 
                                 

Сәйгүлік өмір
21
                                      * * *
Еріншектік айналсын қас жауыңа,
Күрделі істен кепілмін қашпауыңа.
Тындырарсың бәрін де ойдағыдай,
Қиналарсың әлбетте бастауына.
                                      * * *
Жабы дейді бәйгеде озбағанды,
Халқың сүйер от болып, маздағанды.
«Уақыт – емші» дейді ғой, келісемін,
Жазатұғын білдірмей бар жараңды.
                                      * * *
Арманшыл жас аңсайды түу алысты,
Досың міне қарсы алып, құрақ ұшты.
Не жетеді шынайы күлкілерге,
Бақытың сол –  тапқаның қуанышты.