Проблемалық оқыту техпологиясының мәні, мазмұны және принциптері. Проблемалық оқыту «проблема», «проблемалық сұрақ», «проблемалық тапсырма», «проблемалық жағдаят» деген ұғымдарды қамтиды. Проблема - бұл проблемалық жағдаяттағы қайшылықты шешу үшін қойылатын сұрақ. Проблеманы шешуді іздестіру болжам ұсыну мен оның дұрыстығын шешу процестерінен тұрады. Проблеманың белгілері келесі түрде болады: мұғалімнің проблемалық жағдаятты дұрыс құруы, оқушының берілген проблема бойынша шешім табуға дайын болуы. Бұл белгілерді проблемалық оқытуды жүзеге асырудың негізгі шарты деп санауға болады. Проблемалық оқыту технологиясын кез келген сабақта қолдана беруге де болмайды. Проблемалық оқыту оқушыларды өз бетімен жүйелі түрде жұмыс жасауға қалыптастыра отырып, шығармашылық қабілеттерінің кемелдене түсуіне басымдық танытады. Проблемалық оқытуды жүргізу үшін мынадай үш шарт орындалуы қажет: проблемалық жағдаяттың болуы; оқушының берілген тапсырмаға шешім табуға дайын болуы; проблеманы шешудің мүмкіндігі.
