Бұл бөлім 1–4-бөлімдерде меңгерілген білім мен дағдыларға негізделеді. Оқушыларда мəтінді түріне, жанрына, стиліне қарай салыстыру жəне ажырата алу дағдысы бар. Мəтінді тақырыбы мен тірек сөздер, суреттер арқылы болжай алады. Оқушылардың сөйлеу əрекетін (тыңдалым, айтылым, оқылым, жазылым) қалыптастыру жəне дамыту мақсатында берілген оқу тапсырмаларын орындай алады.
Мəнмəтін
Бұл бөлім табиғат əлемін ашады. Мұғалім лексикалық тақырыпқа сəйкес берілген мəтінмен жұмыста оқушылардың бойында мəтінді болжау, құрастыру, салыстыру т.б сияқты дағдылардың қалыптасуына мүмкіндік жасайды. Грамматикалық ұғым, түсінік «Табиғат құбылыстары» лексикалық тақырыбы аясында берілген мəтін арқылы танытылады.
Қысқаша шолу
Бұл бөлімде оқушылар табиғат құбылыстары жайлы бірнеше бейнежазбалармен жұмыс істей отырып немесе фильм тыңдай отырып, табиғат əлемі жайлы көп ақпарат табады. Олар табиғи құбылыстар атауларын жазады жəне қолданады. Бөлімде сөз таптары мен зат есімнің септелуі, септік жалғауының емлесімен танысу, тəуелденген сөздердің септелуі мен көптік жалғаулы сөздердің септелуін дұрыс қолдану практикалық тұрғыда
меңгертіледі. Оқушылардың сауаттылығын арттыруға, көркем жазу, дұрыс оқу дағдыларын қалыптастыруға мəн беріледі.
