Елімнің тәуелсіздігінің дамуына қандай үлес қоса аламын?

Тәуелсіздік - әр ел үшін үлкен құндылық. Осы құндылықтан айырылып қалмау үшін мемлекет егемендігін дамыту жолында аянбай күш жұмсайтыны анық. Мемлекет қоғамнан, ал қоғам жеке тұлғалардан тұрады. Осы себепті, елдің тәуелсіздігінің дамуына тек билік басшылары емес, қоғамдағы әр азамат үлес қоса алады. Дені сау, саналы әрбір тұлға өз елі үшін еңбек етеді. Мен өз елімнің тәуелсіздігінің дамуына қандай үлес қоса аламын? Менің ойымша, қазақ тілінде сөйлеу, халқымыздың ұлттық құндылықтарын дәріптеу, мықты маман иесі атанып, мемлекетке қызмет ету арқылы елімнің болашағына өз пайдамды тигізе аламын.

Біріншіден, мемлекетіміздің егемендігін дамыту үшін ана тілімнің мәртебесінің артуына ат салыса аламын. Мысалы, мен жеке тұлға ретінде отбасымда, қоғамдық орындарда,әлеуметтік желіде қазақ тілінде сөйлеуім, қазақша кітаптар оқу, ана тілімде ән тыңдауым тәуелсіздігіміздің дамуына үлес қосатын үлесім деп санаймын. Себебі, «ұлттың болашағы - оның ана тілі» деген халық даналығы бар. Болашақта өз жанұямды құрғанда да, балаларыма қазақ тілінің қасиетін ұқтырып, ұлттық тәрбиені бойына сіңіріп тәрбиелеу арқылы еліміздің тәуелсіздігінің дамуына үлес қосатыныма сенімдімін.

Екіншіден, «ұлттық құндылық - ұлттың қорғаушы шамшырағы» дегендей, ата бабамыздан қалған құндылықтарды дәріптей жүріп, тәуелсіздігімді дамыта аламын. Мысалы,мен қазақтың ұлттық ойыны тоғызқұмалақ ойынын ойнап,шет елдерге жарыстарға шығамын, себебі ұлтымның қазынасын дамыту өзімнің парызым деп білемін. Бүгінде тоғызқұмалақ ойынын барлық әлем таниды деп айтсам да болады. Көршілес түркі елдерінен басқа Қытай, Корея, тіпті Еуропа елдері ұлттық ойынымызды қызыға ойнайды. Тоғызқұмалақ ойынын тану арқылы өзге елдер халқымыздың мәдениетімен танысады. Болашақта да ұлттық ойынымызды дәріптеп, ары қарай дамыту арқылы өзге елдердің алдында қазақ халқының дәрежесін көтеріп, тәуелсіздігіміздің дамуына үлесімді қоса аламын.