Социалистік реализм. Өнер партиялық цензураға толығымен бағынып, социалистік реализмге бағытталуы керек болды. Бұл әдістің саяси мәні өнер шеберлері кеңестік өмірді шынайы емес, социализмдегі уәде етілген кейпінде көрсетуі керектігінде еді. Өнер бақытты уақыттың келіп жеткендігін елестетіп көрсетті. Адамдардың санасында үміт еткен болашақ пен қазіргі уақыт арасындағы шегара астасып кетті. Биліктегілер осы жағдайды қоғамның социалистік-психологиялық тұтастығын құру үшін пайдаланды. Осындай социалистік-психологиялық феноменнің құрылуына үлкен үлесті кинематограф пен музыкалық өнер қосты. Социалистік реализмге адалдықты сурет өнерінің шеберлері де көрсетуі керек болды. Бұл кезеңде Сталиннің портреттері, мүсіндері мен бюсттері қалалар мен мекемелердің міндетті атрибутына айналды. Культ - бұқаралық сана феномені. Оның тамыры қалыптасқан дәстүрлер мен бұқараның психологиясында жатыр. Қоғамның түрлі топтары культті міндетті деп қабылдады және осылайша диктаторлық режімнің нығаюына көмектесті.
