Зерттеу тақырыбының хронологиялық шеңбері - 1917-1939 жылдар аралығы болып табылады, яғни ұлт зиялы қауым өкілдерінің автономиялық мемлекет тәуелсіздігі жолындағы күрес кезеңінен бастау алып, Түркістан ұлттық мемлекеттілігін М. Шоқай бастаған саяси эмигранттардың Еуропадағы тәуелсіздік үшін идеологиялық күресіне дейінгі уақыт аралығын қамтиды.
Тақырыптың ғылыми зерттелу деңгейі. Қарастырылып остырған тақырып бойынша бүгінгі күнге дейін бірнеше ғылыми дүниелер жарыққа шықты. Жұмысты жазу барысында көптеген мұрағаттық және деректік құжаттарды, арнаулы ғылыми зерттеулерді, монографияларды, баспа беттерінде жарияланған мерзімдік басылымдарды негізге алды (кеңестік, отандық, шетелдік). ХХ ғасырдың алғашқы жартысындағы ұлт зиялы қауымы өкілдерінің тәуелсіз мемлекет құру жолындағы көтерген идеяларына қатысты көзқарастар ғылыми зерттеулерде көбінесе бір-біріне қарама-қарсы пікірде жазылып келді. Бұлай әртүрлі пікірдің туындауы осы аталмыш мәселеге кеңестік жүйенің әсері мен оны шешу жолындағы күрестің әртүрлілігімен байланысты болды.
