Зерттеу жұмысының өзектілігі. Жалпы семантикада әлі күнге дейін шешілмеген күрделі мәселелердің бірі – сөздің лексикалық мағынасы. Лексикалық семантика жайында оқулықтар, монографиялар жазылып, диссертациялар қорғалғанымен, сөз мағынасының қыр-сыры толық және жан-жақты шешілді деп айта алмаймыз. Ғылымдағы қалыптасқан көзқарастарды жаңаша пікірлермен салыстыра, сабақтастыра отырып, лескикалық семантиканы танымдық, коммуникативтік ерекшеліктерін жаңаша бағамдаған ғылыми көзқарастардың ерекшеліктерін саралай көрсету маңызды деп білеміз. Қазақ тіл білімінде лексикалық семантика мәселелері семасиологиялық және ономасиологиялық тұрғыдан дәстүрлі түрде біршама зерттелгенімен, оны генетикалық тұрғыдан қарастыру жайы әлі сөз болған емес. Диссертация тақырыбының көкейкестілігі де осында деп білеміз.
