Екінші бөлім бойынша тұжырым

1) Кез келген дисфемизмнің әдеби тілде баламасы болады. Ол осы негізгі белгісі арқылы өзімен тектес эмоционалды-экспрессивті сөздерден де, қарапайым сөздерден де оңай ажыратылады.

2) Барлық дисфемизмдерді: а) неке мен туыстық қарым-қатынастарға байланысты дисфемизмдер; ә) мінез-құлыққа байланысты қалыптасқан дисфемизмдер; б) іс-қимыл, қозғалысқа байланысты қалыпасқан дисфемизмдер; в) эмоционалды-экспрессивті сөздердің негізінде пайда болған дисфемизмдер; г) қарапайым сөздердің негізіндегі дисфемизмдер; ғ) көп мағыналы сөздердің негізінде пайда болған дисфемизмдер деп топтастыруға болады. Дисфемизмдер бұл топтардың бірінде көп кездессе, бірінде аз ұшырасады.

3) Халық сөздің қоғамдық мәнін, құдіретті күшін, қадір-қасиетін барынша дәл аңғарып, сол арқылы өзінің көзқарасын, сан алуан сезім-күйін, бағамын, т.б. қатысын білдіріп отырған. Мысалға жылы сөз айтып, біреудің көңілін көтеріп, күлдіруге де болады, керісінше қатты сөз айтып, намысына тиіп, ренжітуге де болады. Бұл сипат дисфемизмдердің барлығына тән.