Соңғы кездері өмірім, анығында өмір сүру тәртібім, жүйелене бастаған сияқты (Шүкір). Азанда тұрып, соңғы семестрдегі сабақтарыма аяңдаймын. Түскі асымды уақытылы ішіп, сәскеде көз іліп алатын болдым

Соңғы кездері өмірім, анығында өмір сүру тәртібім, жүйелене бастаған сияқты (Шүкір). Азанда тұрып, соңғы семестрдегі сабақтарыма аяңдаймын. Түскі асымды уақытылы ішіп, сәскеде көз іліп алатын болдым. Ұйықтап болған соң, терезені ашып Астананың кермек әрі ызғарық ауасын өкпемді толтыра кең тыныстаймын. Скайуолк салынғалы бері бұл таза ауаны осылай ғана жұтып жүргенімізге мысқылдана күліп, терезенің тұтқасын берік ұстап жабыстырып барып жабамын. Сабақ оқуға не керек?! 4 жылдан бері серігіме айналған асусымды құшақтап сумкама саламын. Оның қуаттаушысын да (зарядное устройство). Ахахах, соңғы кездері барынша қазақша сөйлеуге һәм жазуға машықтанып жүрмін. Бұл қазақ тілі деңгеймінің түсіп бара жатқанын аңғарғандықтан ба, немесе Қазақ Әңгімелері курсына байланысты ма?! Оны ойланып та жататын уақыт жоқ. Дәптер-парақтарымды уыстап ноутбукпен бірге ығыстырып салып, сумкамның ең үлкен сырмасын сырғытамын. Оны да жай, дауысын шығармай жабуға тырысам, барынша сыртқы ортама минималды түрде кедергі келтіруге тырысып баққаным. Кука үшін. Ол түс уақытында кей кездері ұйықтап жатады: осы семестрде сабағы әдеттегіден аздау екен. Жарайды, соңына қарай құлаққаптарымды сумкама умаждап салып қоямын. Сабақ уақытында концентрациямды бұзбас үшін. Әсте осы альма-матерге аяқ басқалы құлаққаппен сабақ оқу – күнделікті іс.