Саяси жүйе: түсінігі және мазмұны

Саяси жүйе сыртқы ортадан түсіп отыратын импульстарға (әсерлерге) белсенді жауап қайтаратын өзін-өзі реттейтін, өзін-өзі дамытатын организм. Саяси жүйе сыртқы ортамен (қоғ-мен) «кіріс» және «шығыс» принциптері арқылы байланысады. Кірістің екі түрі бар: қоғамның талаптары (мысалы, жалақыны көбейту, әлеуметтік бағдарламаларды кеңейту, азаматтардың құқығы мен бостандығы, әскерді милитандыруға қаржыны азайту т.б.). Мұндай талаптар көбейіп оған билік басындағылар назар аудармаса, саяси жүйе әлсірейді. Кірістің келесі түрі: қолдау. Ол үстемдік етіп тұрған жүйені күшейтеді. Мысалы, салықты уақытында төлеу, әскери қызмет, заңдарды сақтау, билік органдарын, мемлекеттік символдарды құрметтеу, саяси өмірге белсене қатысу т.б. «Кіріс» арқылы сыртқы орта саяси жүйеге ықпал жасайды. Жүйе түскен талаптарды, қолдауларды қарастырады, реттейді, талап, қолдауларға жауап береді, яғни «шығыс» жасайды, биліктің шешімдері шығады, іс-шаралар жүргізіледі. Егер билік басындағылар қоғам мүшелерінің талаптарын тыңдамаса, оның шешімдері қолдау таппайды. Егер талаптар шамадан тыс көп болмаса және «кіріс» пен «шығыс» әрекеттері дер кезінде үйлестіріліп отырса, саяси жүйе тұрақты қызмет атқарады. Жүйенің шешімдері мен іс-әрекеттерін халықтың қолдауы оның легитимдігінің шарты болып табылады. Ал керісінше, саяси жүйені қолдаудың болмауы оны дағдарысқа әкелуі мүмкін. Биліктің қате шешімдері тұрақсыздандырғыш фактор ретінде болуы мүмкін.

Сонымен бірге саяси жүйе – бұл оның өзінің ішкі элементтерінің байланысы. Саяси жүйенің құрылымдық элементтеріне саяси институттар, саяси қатынастар, саяси нормалар мен ережелер, саяси сана мен мәдениет жатады.

Саяси жүйенің функциялары: басқару, реттеу, біріктіру, бөлу, жұмылдыру, бақылау.