Психологиялық дамуының тежелуі бар балалардың ерекшелігі

Баланың психологиялық дамуының тежелуі мектеп жасына келгенде анық байқала бастайды. Дамудың тоқтап қалуының негізгі ерекшелігі баланың психикалық әрекетінің қалыптасуының бірқалыпты болмауы. Бұл балаларға тән ерекшелік - баланың зейіні мен жұмыс қабілетінің төмен болуы. Кейбір балаларда іс-әрекеттің басында зейіндері жоғары күшті болады да, кейін ол төмендей бастайды. Ұзақ мерзімді, қысқа мерзімді есте сақтаудың төмендеуі, есте сақтау беріктілігінің жетілмеуі, интелектуалдық белсенділіктің төмендеуі – осы категориядағы балаларға тән ерекшелік. Белсенді сөздігі айтарлықтай тарылған, түсінігі толық дәл емес, танымдық белсенділігі жеткіліксіз, ол баланың тез шаршауымен, тежелгіштігімен сипатталады. Мұндай балалар өзінің құрдастарынан кеш жүріп, тілі де кеш шығады. Олардың салмағы аз, бойы аласа, көп сөйлемейді, әлжуаз, тез шаршап, көп ауырады, берілген тапсырманы орындау барысында зейін қабілетінің төмендігі, ұқыпсыздығы айқын сезіліп тұрады. Психикалық дамуының тежелуі бар балалардың оқу үлгерімі төмен болады. Бұл балалардың оқуға үлгермеушілігі 1-сыныптан бастап көріне бастайды. Бірақ анық белгілері 2-3сыныптарда белгілі болады.