16 наурыз – Жайлау күні. Айнала табиғатпен біте қайнасып өмір сүру
көшпелі қазақ дүниетанымының бір бөлігін құраған. Сол себепті ұлық
мерекеде жаратылысты аялау мақсатында табиғат аясында бір күн өткізу
маңызды. Бұл өскелең ұрпақтың экологиялық, зияткерлік санасын дамытуға
септігін тигізеді және денсаулығын жақсартады. Адамдар табиғат аясында
серуен құрып қана қоймай, сонымен қатар ондағы қоқысты тазартып, тал егіп,
көшет отырғызады.
17 наурыз – Волонтерлердің қатысуымен игі істер күні/дархандық күні. Бұл күні әр адам мүмкіндігі келетін бір жақсы іс жасайды.
Волонтерлердің қатысуымен түрлі іс-шаралар өтеді. Жаппай халықтың
қатысуымен тазалықтар өткізіледі.
Сонымен қатар, наурызды тойлау апталығының бұл күні жоқ-жітімге,
жарлы-жақыбайға қол ұшын беруге арналады. Дәулеті мүмкіншілік беретін
адамдар әлеуметтік жағдайы төмен отбасыларға «наурыз дастархан» ретінде
азық-түлік үлестіреді. Сонымен қатар жомарт жүректі азаматтар қоғамдық
маңызы бар объектілер салуға, жөндеуге атсалысады. Осы күні жергілікті
әкімдіктер түрлі қайырымдылық акцияларын ұйымдастырады.
