«Ақбоз аттың арызы» фельетоны жан-жануарлардың арызы түрінде жазылуымен-ақ оқырманның езуіне күлкі үйіреді. Бұл арада сықақшы баспасөз сияқты идеологиялық қару мен жан-жануарларды байланыстыра отырып, оқиға құрауы тосын. Баспасөзге қатысты сынды жануарлардың ауызымен жеткізуі қызықты шыққан.
«Тұмаршалы келіншек», «Алма жеп отырғанда»атты шығармаларында адам баласының бойындағы жеңілтектік, дүниеқұмарлық сияқты моральдық кемшіліктерді тікелей сынау тәсілі айқын көрінеді.
«Сандықтан шыққан сайтан» кітабына кірген сықақ әңгімелері өз кезінде қоғамда етек алып кеткен әлеуметтік кемшіліктерді аямай сынауымен жұрт назарын аударған болатын. Әр әңгіме сюжеті де, кейіпкерлері де жеке-жеке болғанымен, айтылар ойдың құйылатын арнасы ортақ болып келіп отырады.
