Жыныс жолдарымен таралатын инфекциялардың әлеуметтік-медициналық мәселелері

Соңғы 20 жыл арасында жыныстық қатынастар барысында таралатын аурулардың түрлері де көбейді. Оның ішінде трихоманиаз, хламидоз, уреаплазмоз, урогениталдық кандидоз аурулары еселеп өсу үстінде. Жыныстық қатынастар арқылы берілетін инфекциялардың осылайша жоғары деңгейде таралуына Республика тұрғындарының өмір сүру жағдайы мен салтының өзгеруі себеп болып отыр. Әсіресе жастардың жеңіл жүріске бой ұрып, кім көрінгенмен жыныстық қатынасқа баруы, гигиеналық ережелерді сақтамауы, олардың арасында наркомания мен алкоголизмнің белең алуы эпидемиологиялық жағдайдың ушығуының негізгі себептері болып отыр. Осы аурулардың кеңінен етек алуына дәрігерлер де кінәлі. Себебі жыныстық қатынастар арқылы берілетін аурулардың алдын алуға болады және осы аурулардан тез емделу мүмкіндігі бар деген деректерді дәрігерлердің өздері ақпараттық құралдарда, телевизиялық эфирлерде жиі айтып жүр. Шындығында бұл аурудың созылмалы түрлерін толық емдеп шығу өте қиын, жеке ауруларды тудыратын инфекциялар дәрілердің әсеріне тұрақты. Сондықтан жыныстық қатынастар арқылы тарайтын инфекциялардан туындаған аурулар репродуктивтік жастағы әйелдердің бала көтеру қасиетін жоғалтуға, ал ер кісілердің потенциясынан айрылуына алып келеді. Осындай жағдай Европа елдерінде және Америка Құрама Штаттарында кеңінен таралған. Сондықтан да олардың арасында бала асырап алу оқиғалары өсе түсуде. Өмір заңы бойынша адамның ең маңызды міндеті дүниеге бала алып келу және ұрпақтардың одан ары жалғасуын қамтамасын ету екендігін ұмытпауымыз керек. Егер тұрғындар арасында туылу көрсеткішінің төмендеуі одан ары жалғасса, жер бетінен көптеген ұлттар мен ұлыстардың жойылып кету қаупі бар. Ал саны аса жоғары емес қазақ ұлтының арасында жыныстық қатынастар арқылы берілетін аурулардың арта түсуі, еліміздің тәуелсіздігіне және егемендігіне тікелей төнген қауіп деп қарастыру қажет.

Шет елдік ақпараттық құралдарда жеке артистер мен мемлекет қайраткерлерін дәріптеу және олардың СПИД ауруынан, наркоманиядан және алкоголизмнен өліміне қайғыру оқиғалары жиі көрсетіледі. Осыдан жастардың санасында осы қайраткерлердің жоғары абыройға ие болу сезімі қалыптасуда. Оған мысал ретінде, балетмеистер Эдуард Нуриев пен артист Майкл Джексон сияқты тұлғалардың өмірін алуға болады. Алайда бұл атақтылардың бірі СПИД-тен, екіншісі наркоманиядан өлгендерін есепке алсақ, онда олардың өз істеріндегі жетістіктерінің түкке тұрмайтындығын байқауға болады. Қазіргі таңда Қазақстан Республикасында іске асырылып жатқан мемлекеттік профилактикалық шаралардың тиімділігі аса жоғары емес. Елімізде түнгі жезөкшелік белең алып, тұрақты коммерциялық сипатқа ие болып отыр. Оған жастар да, ересек адамдар да кенен тартылуда. Бұл үрдіске қарсы профилактикалық жұмыстарды қатаң заңды жолға қою қажет. Медицина қызметкерлерінің және құқық қорғау органдарының осы бағыттағы солқылдақ шаралары не әлеуметтік, не медициналық тиімділігін бермей отыр.