Таулы, ақылды, өнерлі сияқты туынды түбірлерде негіз сөздің туынды түбірде сөз табы өзгерді, зат мағынасы белгі мағынасына көшті. Бірақ мағынадағы өзгеріс өте үлкен емес. Таулы – тауы бар жер, ақылды – ақылы бар адам, өнерлі – өнері бар адам дегенді білдіреді. Мысалға келтірілген туынды түбірлердің бәрінде негіз сөздің мағынасында өзгеріс болған, ол мағыналық өзгеріс әр топта әр түрлі. Бұдан шығатын қорытынды негіз сөзбен салыстырғанда, туынды түбірдің мағынасында қандай болса да, белгілі бір өзгеріс, түрлену болады екен. Сондықтан негіз сөз бен туынды түбірдің мағынасы бірдей бола алмайды. Бұл туынды түбірдің мағынасында түрлі дәрежеде өзгеріс болатынына дәлел. Олай болса, туынды түбірдің мағынасында өзгеріс болу туынды түбірдің белгілерінің бірі болып саналады, өйткені мағыналық өзгеріс міндетті болып табылады.
