Жүйке жүйесі - ағзаның тіршілігі мен негізгі қасиеті-тітіркенгіштікті қамтамасыз ете отыра, адамды сыртқы, ішкі ортамен байланыстыратын күрделі жүйе. Анатомиялық тұрғыдан жүйке жүйесі орталық жүйке жүйесі және перифириялық жүйке жүйесі болып жіктеледі. Орталық жүйке жүйесіне бас миы мен жұлын, перифириялыққа-шеткі жүйке түйіндері мен олардан шыққан талшықтар, талшықтардың терминальді ұштары жатады. Жүйке жүйесінің морфологиялық субстраты - рефлекторлық доға. Жүйке жүйесі жүйке түтігі мен ганглиозды пластинкадан бастау алады.
Нейрондар немесе нейроциттер — жүйке тінінің негізгі морфологиялық және қызметтік құрылымдық бөлігі. Жүйке жасушалары — өсінділі жасушалар. Олар нейролеммадан, нейроплазмадан , ядродан және жасуша денесінен таралатын өсінділерден құралған. Жүйке жасушаларының нейроплазмасында базофильді түйіршіктер және нейрофибриллалар болады.
Жүйке жасушаларының өсінділері қызметіне байланысты: дендрит және аксон болып екіге бөлінеді. Нейроциттер дендриттері қозуды сыртқы орта немесе организмнің ішкі орта әсерлерінен, басқа нейроциттерден қабылдап, жүйке импульстерін нейроцит денесіне, ал аксон — жүйке толқынын нейроцит перикарионынан басқа нейроциттерге немесе орындаушы мүшелерге өткізеді.
