Диалектологиялық сөздiктер. Диалектологиялық сөздiктер және
оларды құрастыру белгiлi бiр ғылыми мақсатты көздейдi. Диалектологиялық
сөздiк әдеби тiлдiң лексикасынан тыс жатқан, бiрақ ұлттық тiлдiң жергiлiктi
тармақтары болып табылатын диалектiлер немесе говорларға тән сөздер мен
сөз тiркестерiн қамтиды. Белгiлi бiр диалектiлерге тән сөздердi жинап,
олардың сөздiгiн құрастырудың және оларды бiлудiң тiлдiң тарихи даму
жолдарын, оған тән заңдылықтарды айқындауда үлкен мәнi бар.
Салыстырмалы сөздiктер. Салыстырмалы сөздiк те ғылыми мақсатты
көздейдi. Онда туыстас тiлдердегi ортақ түбiрлес сөздер берiледi; ондай
сөздердiң әр түрлi туыстас тiлдердегi ұқсас жақтары да айырмашылықтары да
көрсетiледi. Туыстас тiлдердi салыстырмалы – тарихи метод бойынша
зерттеп, олардың даму заңдылықтарын айқындауда салыстырмалы сөздiктер
құнды-құнды материалдар бере алады.
