Шап майдың лимфа түйіндері - шапмайдың арасында жатады. Лимфаны құрсақ пен кеуде қабырғаларының терісінен, құрсақтың көк еті мен тері арасындағы бұлшық еттерінен, ұмадан, жамбастың терісінен, ортан жілік пен тірсектен жинайды. Лимфаны бүйір және ортаңғы мықын түйіндеріне береді.
Тақымдық лимфа түйіндері- санның қалың етінің арасында балтыр бұлшық еттерінің үстінде жатады. Лимфаны артқы аяқтың терісі, еттері, сіңірлерінен жинайды да, жамбас немесе шонданай лимфа түйіңдеріне ағызады.
Шонданай лимфа түйіндері –шонданай сүйегінде орналасқан. Лимфаны жамбас пен құйрықтың терісі мен еттерінен, жамбас пен ортан жіліктің қосылған жерінен, тік ішектен жинайды да жамбас түйіндеріне құяды.
Шаптың үстіңгі лимфа түйіндері- еркек малда жыныс мүшесінің қасында жатады, ал сиырда желінінің үстінде орналасқан. Лимфаны құрсақтың көк еті мен терісін және сан мен тірсектің ішкі жақтағы терісі мен еттерінен жинайды. Жиналған лимфа мықынның дөңгелек лимфа түйіндеріне ағады.
