Зертханалық жануарларды күтіп-бағу, көбейту

Зертханалық жануарлар виварийлерде ғылыми зерттеулерде өсіріледі. Виварийде ғылыми зерттеулерде қолданылатын, яғни тәжірибе барысындағы жануарлар ұсталынады.

Питомник- тәжірибеге пайдаланғанға дейінгі жануарлар өсірілетін жер. Зертханалық жануарларға арналған виварий, питомниктерде қолайлы микроклимат жасалуы қажет. Микроклимат дегеніміз- шектелген кеңістіктегі климат, яғни сол қора жайдың температурасы, ылғалдылығы, жарықтылығы, зиянды газдардың шекті мөлшері, ауа қозғалысы зертханалық жануарлардың физиологиялық тіршілігіне кері әсерін тигізбеуі керек.

Қояндар торда 2-3-тен, ұрғашы, еркегі бөлек орналастырылады. Қояндардың жыныстық жетілуі 6 айда болады. Буаздығының ұзақтығы 28-32 күнге созылады. Туылған көжектер саны 1-12-ге дейін болуы мүмкін. Көжектер енесін 20 күнге дейін еміп, жұмсақ азықтарды біртіндеп қабылдай бастайды. Көжектерді енесінен 1-1,5 айында біртіндеп айырып, торларға қоңдылығына, жынысына байланысты 2-3 тен топтайды.

Теңіз шошқасы торда 4-5-тен орналастырылады. Теңіз шошқасын шағылыстыруға 9 айдан кейін ғана жібереді және ұрғашысының салмағы 540 г, ал еркегінің салмағы 630 г кем болмауы қажет. Теңіз шошқаларын шағылыстыру үшін бос торға ең алдымен еркегі, содан соң 4 ұрғашысы орналастырылады. Буаз теңіз шошқаларын жеке торларға ауыстырады, олардың буаздығы 2 айға, ал лактация кезеңі 1 айға созылады. 1 аналық теңіз шошқасы 2-3-тен балалайды. 1 айдан кейін жас теңіз шошқаларын 5-6 бастан торларға орналастырады.

Ақ тышқандар торда 1 еркек 5-6 ұрғашыдан орналастырылады. Осы жерде тышқандардың шағылысуы, көбеюі және өсуі өтеді. Жыныстық жетілген тышқандардың салмағы ұрғашысінікі – 18-19 г, еркегінікі- 19-22 г болады. Тышқандардың буаздығы 18-25 күнге созылады, туылған кезде тышқандардың салмағы 1,5 г болады. Тышқандарды 25-30 күндік жасында енесінен айырып, торларға 20-25 бастан орналастырылады. Бұл кезде жас тышқандардың салмағы 8-10 г-ға жетеді.