Еліміздің теріскейіндегі Қостанай өңірі тамаша табиғатымен ғана емес, көне замандардан сыр шертетін оба-қорымдар мен сәулет-мәдениет ескерткіштерінің көптігімен танымал
Еліміздің теріскейіндегі Қостанай өңірі тамаша табиғатымен ғана емес, көне замандардан сыр шертетін оба-қорымдар мен сәулет-мәдениет ескерткіштерінің көптігімен танымал Ресми мәліметке сенсек, аталмыш өңірде 726 тарихи ескерткіш бар екен. Тарихи-мәдени мұраларға жататын нысандардың саны 500-ден асады. Сондай ескерткіштердің бірі – Екі Дің кесенелері. Түп тарихы шамамен ерте темір ғасырынан басталатын бұл кесенелер бүгінде туристер көп келетін нысандардың бірі болып отыр. Бір-бірінен біршама алыс қашықтықта орналасқан екі төбенің үстінде орналасқан қос кесене Арқалық қаласының Сарыторғай ауылына жақын жерде жатыр. Жалпақ тастардан өрілген сфералық формадағы көне ескерткіштер. Біреуі Бейсен қыстауынан солтүстік-батысқа қарай 1,5 шақырым жерде орналасқан. Жанында Қараторғай өзені ағып жатыр. Үйіндінің диаметрі 15, биіктігі 0,7 метр. Сыртында ені 5 метр болатын ор қоршалған, оның тереңдігі 0,3 метр. Екіншісі де киіз үй тәрізді құрылыс. Жалпақ табиғи тастарған салынған диаметрі 6 метр болады, ал жалпы биіктігі 3,8 метр.
