Байланысты: Азық түлік тауарларын тану және сараптау
Маринадталған жемістер мен көкөністер. Маринадтау сірке қышқылының консервілеуші әрекетіне негізделген. Маринадтау кезінде тұз, қант және татымдықтар (дәмқабық, қалампыр, бұрыш, лавр жапырағы) қосады. Маринадтарды қиярдан, томаттан, орамжапырақтан, қызылшадан; жемістерден: алма, көк өрік, жүзім және т.б. дайындайды. Әдетте маринадта 0,3–09% сірке қышқылы болады, оларды герметикалық жабады да, пастерлейді. Сірке қышқылының мөлшеріне байланысты көкөніс және жеміс-жидек маринадтарын әлсіз қышқыл (қышқылдылығы 0,2–0,7%) және қышқыл (қышқылдылығы 0,71– 0,9%) деп бөледі.
Көкөніс маринадтары. Қиярды, томатты, кәдіні, паттисонды, қызылшаны, пиязды, орамжапырақты, бұрышты бөлек немесе ассортиі түрінде маринадтайды. Сапасы бойынша көкөніс маринадтарын жоғары және І тауарлық сұрыпқа бөледі. Жоғары сұрыпты маринадталған көкөністер бүтін немесе туралған, таза, езілмеген, механикалық зақымдалмаған болу керек. Түсі біртекті, табиғи түсіне жақын, тығыз консистенциялы, жағымды, сәл қышқыл немесе қышқыл дәмді, шекті тұздалған, татымдықтар ароматты, тұздығы мөлдір болу керек. І сұрыпты маринадта жұмсағының тығыздығы төменірек, сәл қытырлы, лайлы тұзды болуы рұқсат етіледі. Маринадтардың нетто массасына шаққанда көкөністердің мөлшері – бүтін маринадталған – 50%, туралған – 55% болу керек.
Жеміс-жидек маринадтарын жемістерде, жидектерден немесе жемістер мен жидектердің қоспасынан (алма, алмұрт, жүзім және т.б.) дайындайды. Маринадтағы жемістер мен жидектер өлшемі бойынша біртекті, дұрыс пішінді, ауру емес, зақымданбаған болу керек. Түсі біртекті, балғын жеміс түсіне сай, құймасы – мөлдір, дәмі – жемістер мен жидектерге тән қышқыл немесе қышқыл-тәтті болу керек.
