Қазақстан Республикасының Еңбек кодексі Қазақстан Республикасының 23.11.2015 N 414-V ҚРЗ кодексі (ҚР ЕК). 11 тарау. Кепілдіктер мен өтемақы төлемдері 124 бап. Қызметкерлердің мемлекеттік немесе қоғамдық міндеттерді орындауы кезіндегі кепілдіктер 1. Жұмыс беруші Қазақстан Республикасының заңдарында көзделген жағдайларда жұмыскерлерді мемлекеттік немесе қоғамдық міндеттерге тартқан уақытта олардың жұмыс орнын (лауазымын) сақтай отырып, Еңбек міндеттерін орындаудан босатады.
2. Мемлекеттік және қоғамдық міндеттерді орындағаны үшін қызметкердің жалақысы көрсетілген міндеттерді орындау орны бойынша, бірақ жұмыс орны бойынша орташа жалақыдан төмен емес мөлшерде төленеді.
3. Медициналық комиссиядан өту кезеңінде мерзімді әскери қызметке немесе әскери жиындарға шақырылуға жататын жұмыскерлердің жұмыс орны (лауазымы), жергілікті әскери басқару органдарына шақыру туралы шақыру қағазы болған кезде жұмыс орны бойынша жалақысы сақталады, ал мерзімді әскери қызметті немесе әскери жиындарды өткеру кезеңінде жұмыс орны (лауазымы) сақталады.
Мерзімді әскери қызметті немесе әскери жиындарды өткеру кезеңінде жұмыс орны (лауазымы) сақталған жұмыскер әскери қызметтен шығарылуына немесе әскери жиындардың аяқталуына байланысты әскери бөлімнің тізімдерінен алып тасталған күннен бастап бір айдан кешіктірмей өзінің еңбек міндеттеріне кірісуге міндетті.
125 бап. Медициналық тексеруге жіберілетін жұмыскерлер үшін кепілдіктер Осы Кодекске не ұжымдық шартқа сәйкес жұмыс берушінің қаражаты есебінен мерзімдік медициналық қарап-тексеруден өтуге міндетті жұмыскерлердің олардан өткен уақытта жұмыс орны (лауазымы) мен орташа жалақысы сақталады.
126 бап. Донор болып табылатын жұмыскерлер үшін кепілдіктер Донор болып табылатын жұмыскердің тексерілу және қан мен оның компоненттерін донациялау уақытында жұмыс орны (лауазымы) мен орташа жалақысы сақталады, сондай-ақ оларға Қазақстан Республикасының Денсаулық сақтау саласындағы заңнамасына сәйкес өзге де кепілдіктер беріледі.
