Қазіргі таңда оқу әдебиеттерінің сапасы білім беру саласындағы ең күрделі мәселелердің біріне айналып отыр. Оқулық авторларына баспа тарапынан нақты талаптардың болмауы, оқу әдебиеттерінің қысқа мерзімде асығыс дайындалуы, сынақтан өткізу мерзімінің қысқалығы, баспа ішілік сараптаманың әлсіздігі сияқты жағдайлар түрлі мәселелердің туындауына себеп болып отыр. Оқулық жазуға қойылатын талаптар болғанымен, оның ішіндегі мәтіні мен мәтіннен тыс аппаратына қойылатын психолингвистикалық талаптардың анықталмауы, оқулық жазу кезінде авторлар тарапынан оқушылардың жас және психологиялық ерекшеліктері ескерілмеуі де оқулық сапасына әсер етуде.
ҚОРЫТЫНДЫ
Оқу әдебиеттерінің тіліне, мәтіндік және мәтіннен тыс аппаратына қойылатын психолингвистикалық талаптарды анықтап, оның әдіснамалық негіздемелері мен концептуалды қағидаларын әзірлеу, білім алушылардың психолингвистикалық ерекшеліктерін негізге алып жазылған мектеп оқулықтары мен оқу-әдістемелік кешенінің моделін құрастыру және оқулық дайындаушыларға арналған әдістемелік нұсқаулықты әзірлеу - жобаның негізгі ғылыми жаңалығы болып табылады.
Жобаның зерттеу жұмысының барысында 1-11 сынып аралығындағы білім алушылардың тілдік тұлғасының сипатын анықтау, олардың өзіндік ерекшеліктерін көрсету тек оқулықтану, тіл білімі саласында ғана емес, әлеуметтану, жас ерекшелік психологиясы, дефектология секілді салаларда іргелі зерттеулер жүргізуге өз септігін тигізеді.
