«Қазақстан - 2050» стратегиясы: Қазақстанның даму басымдықтары мен бағыттары. ХХІ ғасырдың 10 жаһандық қауіптері

Қазақстан – 2050 стратегиясының мазмұны 3 бөлімнен тұрады. 1-бөлімде 21 жыл ішінде еліміздің жүріп өткен жолына және «Қазақстан-2030» құжатында қамтылған 7 басымдықтардың орындалуына қорытындылар жасайды.

1997 жылы Қазақстан дамуының 2030 жылға дейінгі  стратегиясы қабылданды. Бұл кеңестік кезеңнен кейінгі қиын кезең болатын. Мемлекеттің алдында үлкен міндеттер тұрды: 1) мемлекеттің іргесін қалау, нарықтық экономиканы қалыптастыру; 2) әлеуметтік мемлекеттің негіздерін қалау; 3) қоғамдық сананы қайта өзгерту. Біз бұл міндеттерді орындадық.

1. Тәуелсіз Қазақстанды, қуатты, табысты мемлекетті құрғандығымыз. Шекарамыз белгіленді. Елдің тұтас экономикалық кеңістігін құрдық. Конституциялық және саяси реформалар жүргіздік. Елдің жаңа елордасы – Астананы салынды. Сыртқы дербес саясатымыз қалыптасты.

2. Қоғам демократиялана түсті. Біз «Алдымен экономика – cодан соң саясат» деген айқын формуламен дамып келеміз. Қоғам дамып, демократияландыру мен адам құқықтары саласындағы ең жоғары стандарттарға жақындап келеміз. Конституциямызда адам құқықтарын, бостандықтарын бекіттік. Қазақстанның барлық азаматтары тең құқықты.

3. Түрлі әлеуметтік, этникалық және діни топтардың келісімі мен  татулығы. Қазақстанда  140 этнос пен 17 конфессияның өкілдері тұрады. Олардың арасындағы татулық  пен ұлтаралық келісім – біздің басты құндылығымыз. Біздің еліміздегі татулық пен келісім, мәдениеттер мен діндердің үндесуі әлемдік эталон (үлгі) ретінде танылған. Қазақстан халқы Ассамблеясы түрлі ұлттардың, мәдениеттердің келісімінің бірегей үлгісі болды. Қазақстанда әлемдік діндердің съездері өткізілді.

4. Ұлттық экономикамызды дамыттық. Елімізде нарықтық экономиканың заманауи үлгісі жасалды. 160 млрд. доллардан астам шетел инвестициясы тартылды. Индустрияландыру бағдарламасы жүріп жатыр. Мемлекетіміз әлемдегі ең серпінді дамушы елдер бестігіне енді. Нәтижесінде, біз әлемнің 50 ірі экономикасының қатарындамыз.

5. Қоғамдық тұрақтылық пен келісімді қамтамасыз еткен күшті әлеуметтік саясат. Әлемдегі экономикалық дағдарыстарға қарамастан, мемлекет әлеуметтік салаға ерекше маңыз беріп келеді. Халықтың тұрмыс деңгейі жақсарды. 15  жыл ішінде қазақстандықтардың табысы 16 есе өсті, жұмыссыздар саны екі есе қысқарды. Әлеуметтік мемлекеттің негізі қаланды. Ұлт денсаулығын жақсарту ісінде табыстарға жеттік, білім алуға жұмсалатын қаржы 9,5 есе өсті.

  6. Әлемдік қауымдастық таныған ел. Әлемдік саясатта біздің еліміз  - халықаралық беделге ие жауапты, сенімді серіктес. Біз жаһандық қауіпсіздікті нығайтуда маңызды рөл атқарамыз, халықаралық терроризмге, экстремизмге және есірткінің заңсыз айналымына қарсы күресте әлемдік қауымдастықты қолдаймыз. Азиядағы өзара іс-қимыл және сенім шаралары кеңесін шақыруға бастама жасадық. Соңғы 2-3 жылда Қазақстан Республикасы Еуропадағы Қауіпсіздік пен Ынтымақтастық Ұйымына, Ислам Ынтымақтастығы Ұйымына және Ұжымдық Қауіпсіздік Ұйымына төрағалық етті. Астана экономикалық форумында біз диалогтың жаңа форматын – G-global-ды ұсындық. Біз жаһандық энергетикалық және азық-түлік қауіпсіздігін қамтамасыз етуге лайықты үлес қосамыз.