Жеке басқа қолсұғылмаушылық қағидаты. ҚР Қылмыстық-процестік кодексінде белгіленген негіздер мен тәртіп бойынша болмаса, ешкімді де қылмыстық құқықбұзушылық жасады деген күдікпен ұстауға, күзетпен қамауға алуға немесе өзгеше түрде бас бостандығынан айыруға болмайды. 1966 жылы қабылдаған Азаматтық және саяси құқықтар туралы халықаралық пакт осы қағидаттың негізі болып табылады.
Күдіктінің, айыпталушының қорғалу құқығын қамтамасыз ету. Күдіктінің, айыпталушының қорғалуға құқығы бар. Олар бұл құқықты осы Кодексте белгіленген тәртіп пен жеке өздері де, сол сияқты қорғаушының, заңды өкілінің көмегімен де жүзеге асыра алады. Қылмыстық іс жүргізуді жүргізетін орган күдіктіге, айыпталушыға олардың құқықтарын түсіндіруге және олардың күдіктен, айыптаудан заңда тыйым салынбаған барлық құралдармен қорғану мүмкіндігін қамтамасыз етуге, сондай-ақ олардың жеке құқықтары мен мүліктік құқықтарын қорғау үшін шаралар қолдануға міндетті.
