Бөген – жас тал мінсіз жонылып, жақсы әрленген, морға қыздырылып, қыртысын сыртына қарай иген бесіктің екі басы.
Жақтау – төртеу. Екі үлкен жақтаудың ұзындығы арқалықпен бірдей, қос бөгеннің аңғарларын керіп тұратын екі жақтаудың ені бесік еніндей тақтайша.
Шабақ– төртеу. Екі бөгеннің аяқтарын қосып тұратын ұзын жақтауларға біркелкі қашықтықта көлденең қашалып бекітілген бесік еніндей тақтайша.
Сабау – екеу. Екі бөгенді қосып тұратын екі ұзын жақтаудың астына түсетін, бесік ұзындығына тең жұмыр ағаш.
Жорға– екеу. Бөгендердің иілген басына қарама-қарсы бекітілген, астыңғы қыры қайқы – бесіктің табаны.
Шүмек – бесіктегі сәбидің кіші дәреті үшін қойдың асық жілігінің бір басы тесіліп, екінші басының төменгі жаны ойылып жасалған түтікше.
Түбек– сәбиді бесікке бөлегенде жаялығы былғанбау үшін бесіктің астын тесіп орнатылатын алмалы-салмалы киіз қалта.
БЕСІКТІҢ ЖАСАУ-ЖАБДЫҚТАРЫ Ши – бесік шабақтарының үстінен ұзынынан жайылатын, түбек бекітілер тұсы ойық, тоқылған ши төсеніш.
Жөргек– шидің үстінен төселетін, түбек тұсы ойық жұқа киіз немесе арасына мақта, жүн салынып сырылған көрпеше.
Қауыздау киіз – жөргектің астына салатын киіз.
Құс төсек – түбек тұсында дөңгелек ойығы бар, жөргектің үстінен төселетін, арасына құс мамығы салынып, қабылған жұмсақ төсеніш.
Жастық– бесік енімен бірдей, арасына құс мамығы толтырылған кішкене жастық.
Көрпе – жұқа матадан тігілген жаздық және арасына мақта, түйе жүні салынып қабылған қыстық жамылғы.
Жаялық– сәбидің денесін орайтын жұмсақ мата.
Кепіл – түбек ойығын төңіректеп төселетін, сәбидің жалаңаш тәні қажалмау үшін жамбас тұсына, тізе аралығына кепіл ретінде салынатын кішкене жұмсақ жастықшалар.
Таңғыш – екеу. Ұштары бесіктің екі жанындағы сабау ағаштарға таңылатын, біреуі бөленген сәби, көкірек тұсынан, екіншісі тізеліктің үстінен түсетін, биязы жүннен тоқылған құр немесе екі-үш қабат мата сырып, ызып жасаған тартпа бау.
