Арнайы мектепте математиканы оқытудың дайындық кезеңі

Көру қабілеті бұзылған балаларға математиканы оқыту үрдісі арнайы пропедевтикалық (дайындық) кезеңінен басталады. Бұл мерзім ішінде мұғалім білім беру, түзету және тәрбие мәселелерінің көбісін шешеді. Математиканы оқытудың негізгі білім беру мақсаты – көру қабілеті бұзылған балаларды жүйелі математикалық білімдерді қабылдауға үйрету. 1- сынып оқушыларының өлшемдік, кеңістіктік, уақыт жөніндегі мәліметтерді қалыптастыру. Т.В.Розанова математикалық білімдердің меңгерілуін толық қамтамасыз ететін әдістемелік талаптарды анықтады. Бұл талаптар оқушылардың кемшіліктерін, дүниетаным ерекшеліктері мен жастық айырмашылықтарын ескереді. Дайындық кезеңіне келесі талаптар қойылады: - заттық-тәжірибелік әрекеттерді ұйымдастыру (өлшем, уақыт, кеңістік, қатынастар жайлы түсініктер); 28 - тілдің белсенді түрін дамыту, оны математикалық ұғымдармен байыту; - ойлау операцияларды жетілдіру (сұрыптау, қорытындылау). Математикалық білімдердің оқытылуы сабақта жүзеге асырылады. Сабақ – білім берудің негізгі формасы болып табылады. Арнайы мектептерде дайындық кезеңінде өткізілетін сабақ 35 минуттан аспауы қажет. Сабақтың жоспары балаларды жан-жақты зерттеу мүмкіндігі болатындай және математикалық білімдердің қорын жетілдіретіндей құрастырылуы керек. Бұл кезеңде сабақтың дидактикалық және көрнекілік материалымен толық жабдықталуы қажет. Сабақта түгел сыныппен жаппай (фронтальды) жұмыс өткізіледі. Бұнда мұғалім балалардың сақталған қабілеттіліктеріне сүйенеді. Мұғалім жаңа тақырыпты түсіндіріп, белгілі бір көркемдік суреттерді көрсетсе, ондағы заттарды, өлшемдерді атаса, оқушылар соны қайталауы қажет. Сондықтан да мұғалім сабақта қолданатын барлық сөздерін, сұрақтарын, суреттері мен құралдарын алдын ала ойластыруы қажет. Қолданылатын әдістер балалардың мүмкіндіктеріне сай болуы керек. Мұғалімнің тілі жай қарапайым сөйлемдерден тұрса, айтылған нұсқаулар да бөлшектеніп берілгені дұрыс. Мұғалім оқу үрдісінің тек ұйымдастырушысы ғана емес, оның басқарушысы болады. Балаларды топтық жұмыстарға тартып, барлығы бірге жауап беруді сұрауы қажет. Бұл оқушылардың зейінінің жоғалып кетуін болдырмайды. Әрбір әрекеттің соңында мұғалім балаларды қорытынды жасауға үйрету керек. Өткен тақырыптарды қайталау жұмыстарын ұйымдастыру әр сабақта шартты түрде өтілуі қажет. Егер өткен тақырып ұмытылса, оны тағы да қайталап, бекітіп, сонан соң ғана жаңа білімдерді меңгеруге болады. Қайталау жаңа тақырыптың сапалы игерілуін қамтамасыз етеді, білім-білік, дағдыларды дамытады. Бір сабақта әртүрлі тақырыптардың қайталануы мүмкін. Мұғалім оқушыларды шаршатпай, қадағалап, сергіту сәтін, іс-әрекеттердің түрлісін өткізуге тиісті. Дайындық кезеңінде дидактикалық және қозғалыс ойындары маңызды. Оларды тек сыныпта ғана емес, ойын бөлмелерінде және мектеп алаңында да өткізуге болады.