Жатыс септік. Қазіргі түркі тілдеріндегі жатыс жалғауының варианттарын салыстыра қарағанда, дауысты дыбыстар ыңғайынан болсын (кейбірінде бұлардың еріндік варианттары бар), дауыссыз дыбыстар жағынан болсын, негізінде –да тұлғасының айналасына топтасады. Әрине, басқы дауыссыз кейбір тілдерде тек –д (азербайжан, түркмен) болып келетіні де бар. Ал, чуваш тілінде –ра, -ре, -че тәрізді басқа түркі тілдерінің ешқайсысына ұқсамайтын варианттар қолданылады. Қалай болғанда да жатыс жалғауы сыртқы тұлғалық жағынан бізге мәлім ежелгі дәуірден біздің тілімізге дейін көп өзгеріссіз жеткенін айту керек. Тіл дамуының барысында бұл септік жалғауына қатысты өзгерістер қолданылу мағыналары мен етістіктерді меңгеру жүйесінен ғана байқалады.
