Жаһандану үдерісінің ықпалымен XXI ғасырға адамзат үлкен ғылыми-техникалық жетістіктерімен жетіп отырғаны белгілі. Жоғары дамыған электрондық техника, ақпараттық және өндірістік технологиялар, медицина мен генетикалық инженериядағы ашылып жатқан жаңалықтар, физика, сандық технологиялар т.б. салалардағы ғылыми жетістіктер адамзат қоғамының өркендеуіне, ілгері дамуына, адамның өмірін жеңілдетуге көп септігін тигізуде. Демек, түрлі саладағы ғылыми зерттеулер дамудың жаңа деңгейіне көтерілуге мүмкіндік беріп отыр.
Қазіргі мұғалім еркін ойлайтын, әлем туралы ғылыми түсінігі бар, саяси, экономикалық, құқықтық және басқа да қоғамдық білімдерді меңгерерген маман болуы шарт. Ғылыми сауаттылық, ізденіс, өзінің педагогикалық білімін жаңарту мен кеңейтуге ұмтылу, заманауи педагогтың қажетті құзіреттіліктері болып табылады. Қазіргі заманғы ғылым мен техниканың жетістіктерін пайдалана білу, зерттеу жүргізу қабілеті де заманауи педагог үшін қажетті, сондықтан ол зерттеу жұмысын жүргізе білу дағдыларын меңгеруі қажет. Зерттеу процесінде педагог нақты материалдар жинайды, талдайды және қорытынды жасайды - бұл оған өз тәжірибесін басқа педагогтардың тәжірибесімен салыстыруға, жаңа білім меңгеруге, сондай-ақ практикада тексеруге көмектеседі.
Ғылым – көп қырлы құбылыс. Түрлі дереккөздерде ғылымның әрқилы мақсаттары беріледі. Энциклопедиялық сөздікте - ғылым мақсаттар, әрекеттер мен құбылыстардың түсіндірмесі және болжамы деген анықтама берілген. Басқа дереккөздерде ғылымның, ғылыми қызметтің белгілі бір құбылысты оған тән түрлерде сондай-ақ оның қолданылуының болашақта тиімділігін алдын-ала көруге болатындығы айтылған.
