Баба кереметі жайлы үзік сыр
Жер басып жүрген ғұмырында екі рет қатты ауырған Қожа Ахмет Йассауи: «Түркі еліне қанағат пен имандылық сыйлайтын еңбек етуді нәсіп ет, Жаратқан! Маған Пайғамбарымыздың (с.ғ.с) ғұмыр жасын қи. Жалғанның алдамшы қызығына алданбай, көзім жұмылғанша еңбек етемін», - деп Аллаға жалбарынып, тәуба жасаған екен, - дейді аңыз желісі. Осы күннен бастап бабамыз 26 жыл бойы дәретсіз жер баспай, уәдесінде тұрып, күні-түні еңбек еткен көрінеді. Алла Тағала Қожа Ахмет Йассауидің тақуалығына рахымы түсіп, ғұмырын ұзартқан екен. Бірақ Пайғамбар жасынан асқан әулие «Бұл дүниенің ендігі жарығы маған артық» - деп, күн сәулесі түспейтін жер асты үй-қылуетке түсіп, өмір сүріпті. Күніне бір мейізді қорек еткен көрінеді.
Ежелгі Отырар жеріне келіп жеткен кезінде Ақсақ Темір науқас екен. Түсінде: «Осы бір шумақ жырды қайтара оқы», - деп кеңес берген ақ киімді кісіні көреді. «Сіз кімсіз?» - деп сұрағанда, «Йассауилық Қожа Ахметпін», - деп тіл қатса керек әулие. Оянса, көкірегінде бір шумақ сайрап тұр екен. Осыдан соң-ақ Ақсақ Темір жолы оңғарыла берген көрінеді. Кейін билігі өсіп, зор дәрежеге жеткен шағында тарихи қала Түркістанға келіп, өзі әулие тұтқан түркі елінің ақыны, ұлы ойшылы Қожа Ахмет бабамызға ғажайып ғимарат тұрғызған екен.
Достарыңызбен бөлісу: |
