Балабақша мен отбасы ынтымақтастығын құру

Отбасындағы ата-ана мен бала арасындағы қарым-қатынас мәселесін В.С.Мухина мен Л.А.Венгер де терең зерттеді. Олар отбасында дұрыс ұйымдастырылған қарым-қатынас пен тәрбие үрдісі нәтижесінде мектеп жасына дейінгі бала өздігінен дербес түрлі әрекеттер (киім кию, жуыну, тамақтану т.б.) орындағандарымен, ата-ана тарапынан көрсетілген эмоционалды қарым-қатынасты әлі де болса аса қажет етеді деп тұжырымдайды. Баланың психикалық дамуына отбасының әсерін көрсете келе, ол жердегі тәрбиелік ықпалдардың дұрыс ұйымдастырылмауы, қарым-қатынасқа қанағаттанбау, ұжымда өз орнын дұрыс сезінбеу, отбасындағы кикілжің жағдайлар, осылардың бәрі бала тәртібінде қиындықтар тудырады деп қорытындылайды [28].

Отбасының балаға тәрбие берушілік қызметтінің мақсаты - балаланың жасын, жеке ерекшелігін, психологиялық процестерін ескере отырып, жарасымды жетілген ұрпақты тәрбиелеу. Көздеген мақсатқа жету үшін отбасындағы тәрбие төмендегі міндеттерді шешеді:

- отбасында баланың өсуіне, денсаулығына қамқорлық жасау, тазалықты қалыптастыру;

- еңбексүйгіштікке баулу, тұрмыстағы, үй шаруасындағы еңбекке құлшынысын арттыру, өзіне - өзі қызмет етуге үйрету.

- отбасы мүшелерімен тіл табысып, дұрыс қарым - қатынас жасауға, үлкенге құрмет, кішіге ізет көрсетуге үйрету .

- әдебиетке, мәдениетке, өнерге тәрбиелеу.

Бұл міндеттер жүзеге асу үшін бала дүниеге келген күннен бастап отбасында, қоғамдық орындарда, мектепте тәлім - тәрбие беріледі.

Отбасы - барлығының басы, жан - жақты даумуының негізі болатын тәрбие институты. Отбасындағы ата - ана мен баланың қарым - қатынас нәтижесінде, адамгершілік, эстетикалық, дене тәрбиесінің алғашқы үлгілері қалыптасады. Ал әке мен шеше - баланың алғашқы тәрбиешілері. Ата – анамен жүргізілетін жұмыс түрлері : топішілік ата - аналар жиналысы, балабақшаішілік ата – аналар жиналысы, ата – аналармен жеке кездесу, ата – аналар үшін ашық есік күні, мерекелік кештерге шақыру, ата – аналарды тренинг ойындарға қатыстыру, отбасылық жарыстарға қатыстыру.

Педагогикада ата - аналармен жұмыс жүргізудің негізгі алғы шарттары көрсетілген:

1. Әрбір отбасының мықты жақтары болады, әр адам жақсы ата - ана болғысы келеді.

2. Барлық отбасы көмекті қажет етеді, көмек түрі отбасының нақты қажеттіліктеріне байланысты болады.

3. Ата – анамен жұмысты ұйымдастыру барысында ата - ананы, яғни отбасын тәуелді ету емес, оның қиыншылықтарды жеңу мүмкіндігін нығайтуды көздеу.

4. Баланың дамуы туралы ақпарат ата - аналарға бала тәрбиелеуде өз ролін жүзеге асыруға ықпал етеді.

5. Әрбір отбасы көрсетілген көмектің тиімділігіне көзі жеткенде ғана, қоғамдық жұмыстарға белсене араласады.

6. Ата - анамен баланың ортақ қарым - қатынастары жөнінде кеңес беру.

Мектепке дейінгі ұйымның отбасымен ынтымақтастығын жүзеге асырудың негізгі міндеттері :

- тәрбиешінің топ ата - аналарының құрамын зерттеуі;

- ата – аналармен тұрақты байланыс орнату;

- ата – аналар ұжымын құру;

- ата - аналардың педагогикалық білім дәрежесі мен мәдениетін үнемі арттырып отыру;

- үштік одақ ( бала, ата – ана, тәрбиеші ) жұмысын жандандыру.

Мектепке дейінгі ұйымның отбасымен ынтымақтастығының атқаратын қызметі :

- ата - аналарды топтағы оқу - тәрбие процесінің мазмұны және әдістемесімен таныстыру;

- ата – аналармен педагогикалық және психологиялық ағарту жұмыстарын ұйымдастыру;

- отбасы тәрбиесі туралы ата - аналарға педагогикалық және психологиялық кеңес беру;

- ата - аналар белсенділерімен жұмыс жүргізу және әр түрлі қоғамдық ұйымдармен, жұртшылықпен өзара әрекеттесуін қауымдастыру.

Мектепке дейінгі ұйымның ата - аналармен жұмысты ұйымдастырудың негізгі мақсаты отбасы мен балабақша арасындағы байланысты күшейтіп, бағытты жұмыс жүргізу, ұйымдастырылатын мерекелік іс - шараларға ата - аналарды тарту.