АЛДАМЖАРОВ Бегділдә (3.4.1946 ж.т.. Қызылорда обл. Қазалы ауд.) -жазушы. ҚазҰУ-ды
бітірген (1970). Әр жылдары "Лениншіл жас" (қазіргі "Жас Алаш") газетінде. "Жазушы"
баспасында, Қазақ теледидарында қызмет атқарған. Қазір "Жұлдыз" журналының бөлім
меңгерушісі. А. оннан астам кітаптың авторы. Ол Фирдоусидің "Шахнама" эпопеясының
"Мәнішеһір" (1973) және "Кей Хосроу" (1976) дастандарын, грузин шайыры О.Челидзенің
балаларға арналған "Алхан мен Шалхан" атты дастанын (1971) қазақ тіліне аударды. А.Пушкин,
А.Блок, Е.Евтушенко, Б.Ахмадуллина, А.Вознесенский, т.б. шайырлардың өлеңдерін аударып,
жинақтарда бастырған. Бірқатар ән мәтіндері "Ауыл кеші көңілді" жинағында жарық көрген. Сын
жанрында да қалам тартып жүр.
АЛДАР (18 ғ„ Жайық бойы. Атырау сағасы) - шешен биі. А. есімі Шынияз, Мұрат, Ы.Шөреков толғауларында, Х.Досмұхамедұлы зерттеулерінде құрметпен аталады. Ел аузындағы әңгімелерге
қарағанда А. Әбілқайыр ханмен замандас, достық көңілдегі кісі болған. Үлкен ұлы Нұралыға енші
берерде Әбілқайыр А-дан бата сұрапты. Осы оқиғаны Мұрат Мөңкеұлы Жылқышымен айтысқанда
мақтан ете толғайды. Сырым Датұлы Нұралы ханмен дүр-дараз болып, оны шабарда А-дан ақыл
сұрапты. Бұл деректер Шынияз ақын жырлары арқылы жеткен.
