Алгебра курсында бұл тақырыпқа берілген есептер теңдеу құру тәсілімен шығарылады [7]. Теңдеу немесе теңдеулер жүйесін құру, содан соң оны шешу өз алдына бір мәселе болып келеді. Өйткені кейбір жағдайларда теңдеуді шешу - оны құрудан да күрделі немесе керісінше болуы да әбден мүмкін. Көпшілік жағдайда мұндай есептерді шығару барысында есептің мағынасын кескіндейтін схемалар, суреттер пайдаланып геометриялық тұрғыдан талдау жасау есеп шығаруды біршама жеңілдетеді. Осы тұжырымды негіздеу мақсатында есептер қарастыралық. Берілген есепті геометриялық тұрғыдан қарастыру үшін: координат жүйесін енгізіп, абсцисса осі етіп t - уақытты,ордината осі етіп s -дененің жүрген жолын алайық. Сонда координат жазықтығындағы әрбір M(t;s) нүктесіне дененің t уақыт аралығында жүрген жолы сәйкес келеді. Ал қозғалыс осы жазықтықта қайсыбір сызықпен кескінделеді (материалдық нүктенің траекториясы) . Бұл физика курсының механика бөлімінен таныс ұғымдар.
