Бағдарламасы бойынша жарық көрді И.ҮРкімбайұлы дала жыры.. Алматы: "Хантәңірі", 2014. 286 бет

Исламғали ҮРКІМБАЙҰЛЫ
ДАЛА 
ЖЫРЫ
Алматы
2014

УДК 821. 512. 122
ББК 84 (5 Қаз)-44
И 41
Қазақстан Республикасы Мәдениет министрлігі 
«Әдебиеттің әлеуметтік маңызды түрлерін басып шығару» 
бағдарламасы бойынша жарық көрді
И.ҮРКІМБАЙҰЛЫ
ДАЛА ЖЫРЫ. . – Алматы: 
“Хантәңірі”, 2014. – 286 бет.
 
ISBN 978-601-03-0277-8 
УДК 821. 512. 122                 
ББК 84(5 Қаз) - 44
ISBN 978-601-03-0277-8
© «Хантәңірі», 2014
И 41

3
              
ӨЗЕКЖАРДЫ
О, менің сырлы далам, жырлы далам,
Шегіртке шырылынан жыр тыңдағам.
Жүрегіме сіңіріп өсіп едім,
Ертегі, аңызыңды мың-мыңдаған.
О, менің ұлан далам, құлан далам,
Қурайдың ызыңынан мұң аңдағам.
Дауылыңнан естимін бабам үнін – 
«Алаш! Алаш! Алаш!» деп ұрандаған.
Маған бірдей жақының, алысың да,
Қызылкүрең топырақ намысың ба!
Жылы жаңбыр ананың көз жасы ма,
Нар інгендей боздаған «арысымдап...».
Таңмен бірге таңдайға түседі өлең,
Жабыққанда жаныма күш едің сен.
Шер құйылып кеудемді сыздатады,
Домбыра мен қобыздың ішегінен.
О, менің құдіретті құйын далам!
Өзіңе сиынды әкем, сиынды анам.
Топырағыңда қанымның иісі бар – 
Өзекжарды өзіңнің ұлың болам!
        

4
ДАЛА  ЖЫРЫ
(ТОЛҒАУ)
I
Шаңы шығып шұбатылған жолыңмен,
Жортып келем ылдыйыңмен, өріңмен.
Айлы түнде күңіренген, құлаққа,
Үн келеді бабалардың көрінен.
Бақ пен соры қатар ұшқан сор  далам,
Үн келеді... боз інген бе, боздаған?!
Ел басына естен кетпес күн туып,
Қасіреттен күйіп кете жаздаған.
Соның бәрі ұрпағыңның жадында,
Өзіңдікі тәнім, әрі жаным да.
Өмір сүрдім о, Ұлы Анам өзің деп,
Өзіңдікі... бағым менен, сорым да.
Тобылғың мен тораңғыңа жылынып,
Көрген жоқпын мен Өмірден түңіліп.
Тағдырыңды жыр етуге жетелеп,
келе жатыр мәңгі сөнбес жыр-үміт.
Күлік міндім күдеріден бау тағып,
Көк бөрідей көкке дауысым жар салып.
Ұрпағына үмітпенен қарасын,
Көрде жатқан Бабаларым тамсанып.

5
О, Ұлы анам,
                    сырласым, һәм, мұңдасым,
Сенен алдым сертке байлап жыр басын.
Ғарышқа да бәйге қосып жарысқан,
Бүкіл Әлем, Дала жырын тыңдасын!
II
Қайран далам, 
                        дархан далам, 
                                             кең далам!
Құшағыңнан сая тапқан мен балаң.
Жүрегімде шала жатыр жанбаған.
Жолым жатыр мен әлі де бармаған.
Асқар-асқар шыңдары бар паң далам,
Өркеш-өркеш құмдары бар маң далам.
Қойныңдағы қазылмаған кен болам.
Жазылмаған әфсанаң да мен болам.
Өзің барда мен кімдерден кем болам!
Бабалардың жүрегі һәм, тілегі,
Топырағыңның түйірі де киелі.
Кіндігімнен байланғамын талыңа,
Ажырамау үшін сенен бір елі.
Бір кездері Білге қаған тірі еді,
Күлтегіннің тулап тұрған жүрегі.
Кең төсіңе тастан сарай салдырған,
Арман-ойын тасқа жазып қалдырған.
Ұрпақ үшін күйінбеген бар ма адам?
Аманатын асылына жалғаған.
Ұрпақ үшін шаршаса да, талмаған.
Қыран көңіл қияларға самғаған.
Тоныкөктің қобызы боп сарнаған.
Ерлік пенен Елдік жолын  таңдаған.

6
Көк сүңгімен сілтегенде ашынып,
Өрт боп келген дұшпан тірі қалмаған.
Жауың келіп жағаңа сан қол салды,
Соңдарынан шұбырынды жол қалды.
Қызылқұмың қызыл қанға малшынып,
Бастар жатты тұяқтарға жаншылып.
Арқалаған қанша арман, қанша үміт,
Жолдар жатты жотасынан шаң шығып.
Бүгінгі дос ертең қайта қастасып,
Қас болғандар, қайыра кеп достасып.
Тұрлауы жоқ алмағайып заманда,
Аш қасқырдай ұмтылды адам-адамға.
Ойын етіп қайырымсыз ажалды,
Сонысымен жеңді Қорқыт  тажалды.
Көрден қорықпау керектігін ұқтырып,
Қарсы ал деді ажалды да тік тұрып.
«Есің болса өлемін деп жылама»,
деген екен Анахарсис ғұлама.
Өз ағасы – Скифтердің көсемі,
Жебесінен өмір оты өшеді.
Өлерінде сөз айтыпты көшелі:
«Менің жаным басқа әлемге көшеді.
Мен өлмеймін, Бақида өмір кешемін...»
деп ағасын кешіріпті деседі.
Бұл далада аңыздар бар мыңдаған,
(Дала жырын бесігімде тыңдағам).
Ұлы Гомер ақындықпен жырлаған,
Күні – өмір, көкжиегі мұң далам.
Бабалардың ерлігінің елесі,
Түсіме еніп, Рухымды шыңдаған.
Көне тарих бетіндегі ізбенен,
Көк Түріктің қағанатын іздегем.

7
Ұлы қаған Мөде маған сыр айтты,
Сыр айтты да тынысымды тыңайтты.
«...Табанымның астындағы қара жер,
Менікі емес, Тәңірқұты болсам да.
Сол жер үшін отқа оранып жансам да.
Жаным қиып жаудан тартып алсам да.
Менікі емес. Ол халқымның байлығы,
Бере алмаймын жанымды әзір алса да!»
Бұдан өткен көрегендік бола ма!
Ғасырлардың көші өткенмен арада,
Мәңгі өшпейтін із тастапты Санаға!
Мирас болған  атадан жас балаға,
Не жетеді, не жетеді Далама!
Отаныңды Тәңірқұты тәрізді,
Сүю керек, күю керек жан аға.
Онсыз сені адам деуге бола ма?!
Туған Жер мен туған Елің – бір ұғым,
Жүрегіңде сақта мәңгі тұнығын.
Жүрегіңде сақта мәңгі құлыным!
Сол екеуін көкірегіңде аяла,
Қажет болса, жаныңды да аяма!
Екеуінен айырылсаң, сол жанның,
Қажеті де бола ма?!
Қайран далам, 
                         тарлан далам,
                                               боз далам!
Жүрегімде сағынышым маздаған.
Қойын-қоншың толған байлық...
                                                 Түп-түгел,
Маған тастап кеткен екен Әз-бабам!

8
Тұр-ан депті көне түркі жұртымыз,
(Көк Түрік-ті, ол кездегі ұлтымыз).
Афрасиаб – Алып Ер Тоңға басқарып,
Жортқан екен ер-тоқымын жастанып.
Иранменен неше ғасыр алысып,
Тұлпарының тұяғынан шаң ұшып.
Тұран жұртын паш етіпті баршаға,
Қара  қарың, қара  белің  талса да,
Ғасыр жүгін көтеруден шаршама!
Дала жыры сыр күтеді қаншама?
Тұрандықтар жетті аман бүгінге,
(Берекеден белім енді бүгілме!)
Жыр төгейін нәрлі қазақ тілінде.
Көне шежіре жетегіне үңілсем,
Тас жазулар тағдырына жүгінсем,
Сол тамырдан өндің дейді бүгін сен!
Ұшар шыңы Көк аспанмен  жарасқан,
Барар жерім Көкше теңіз, Қараспан.
Көкте Тәңір, Жерде Ұмай таласқан.
Сол заманда жаралыппын Алаштан.
Сахарада Күлік мінген мен екем,
Көк теңіздей толқып жатты берекем!
Аяқ астым қазыналы  кен екен.
Жағам алтын, ал, күмістен жең екен.
Далам дархан, дастарханым кең екен.
Арыстандай теңдік сұрап ақырып,
Дұшпаныма жолбарыстай атылып,
Кетеді екем келіспесе жапырып.
Көк Түрікті сахараның серісі,
Ғайыптан кеп сап ететін перісі,

9
Деп біліпті бейбіт күнде ел іші.
Қобыз тартып күңірентіп даланы,
Жазады екен жүректегі жараны.
Домбыраның шанағынан күй тулап,
Басады екен арындап сай-саланы.
Қыз дауысты сыбызғыдан сыр тыңдап,
Қызды ауылда жігіт жүрер қылтыңдап.
Жастардың бал-шекермен тең сезімін,
Жеке-дара көкте ай мен түн тыңдап,
Бәйге тігіп, жүйірікпен жарысып,
Сайын дала жататын-ды бал ішіп.
Палуандар арыстандай алысып,
Атан жілік, қара күштен майысып,
Қарыс сүйем қабырғалар қайысып,
Тас үгітер алақандар қарысып,
Жататын-ды  боз кілемнің шаңы ұшып.
Айтыс деген қазақтардың айбыны,
Ұмыттырар қан жұттырған қайғыны.
Ақындарың аузын айға білейді,
Түйдек-түйдек сөз түкірген қай күні.
Қоңыр ағаш домбырасын сабалап,
Арғы-бергі Алаш жұртын саралап.
Асылдарын айдар тағып даралап.
Жасықтарын жорта қайрап қаралап.
Жыр төккенде қос ішекті сабалап,
Құйқылжиды құлан жортқан бар алап.
Қыз-жігітке жараспай ма перілік,
Ойын-сауық желпілдетіп, желігіп.
Еліктіріп салқам сал мен серілік,
Өзегінде ойнақ салып өр үміт,
Сұлу тұрса кермаралдай керіліп,

10
«Екі аяғын бір басуға ерініп».
Жігіт жүрер келіп-кетіп, көрініп.
Қыз ән салса күміс әуен төгіліп,
Жұрт тыңдайды жан-тәнімен беріліп.
Алты Алаштың  әрбір  күні осындай,
Сөз сөйлейді шешен тілмен тосылмай.
Ақ жүрекпен келсең – қимас досыңдай,
Арамдықпен ара-жолы қосылмай,
Боз даланың еркін өскен төсінде,
Алаш жұрты жыр тыңдайды кешінде.
Қобыланды, Қыз Жібек пен Ер Тарғын,
Ер Төстігі жас-кәрінің есінде.
Баласына, құлын мінген күн ұзын,
Жырмен құяр тәрбиенің уызын.
Іше отырып толғап сары қымызын,
Аңыз айтар кейі қысқа, кейі ұзын.
Астау толы қазы менен қартасы,
Қыза түсер әзілменен ортасы.
Әзіл-айтыс, бәдік-айтыс бәрі бар,
Тола түсер «тіл-төренің» қалтасы.
Алаш жұрты ата сөзін  сыйлаған,
Сары алтындай жауһарларын жинаған.
Жасына емес, жаққа қарап, сөйлесе,
Аталы сөз айтар болса топ жарып,
Алты жасар баланы да тыңдаған.
Мұз тауынан мұнар көшкен мұң далам,
Мұң даламда ізі жатыр Шыңғыстың,
Тағдыр өзі тасқа ұрып шыңдаған.
Бейбарыстың жебесіндей сынбаған,
Түркі жұрты – сайын далам, құм далам.
Қыран едім қиындықтан қыңбаған,

11
Құлан едім құба-дала шыңдаған!
Жылан едім айбаты есті шырмаған,
Құлан-далам, жылан-далам, құм далам,
Құйның боп құладүзде жынданам!
III
Жерде Ұмай, көкте Тәңір жарлығы,
Құзырына алған жансыз-жандыны.
Көне Тұран Даласының төрінде,
Туын тікті енді Қазақ хандығы.
Жәнібек, Керей сұлтандарым, арысым,
Қара қазан, сары баланың қамы үшін,
Атқа қонды отқа қайрап намысын!
Аталардың ақ сақалын жас жуып – 
Тұран жұртын сақтап қалу – басты үміт.
Қазақия сол арманның бастауы,
Көк Түрікке көз алартқан қас жауы.
Қасындағы бауырына қас қылып,
Жүргендер көп қойынына тас тығып.
О, боз далам, таусылмаған арманы,
Күндер өтті құлазыған тарланы.
Жау табанын бастырмайын деп едім,
Жан сарайын аштырмайын деп едім,
Қан сасыған етігімен есердің,
Бал бұлақты кештірмейін деп едім,
Құба талды кестірмейін деп едім.
Қара бұлт торлағанда күнімді,
Қара дауыл  тұншықтырып үнімді,
Қара тұлпар астымдағы сүрінді,
Қараорманым сынбаса да бүлінді.
Алты Алаш бір Алаштан тумап па ек,
Белімізді боз жусанмен бумап па ек.

12
Сұм саясат шерге салды шырмап көп.
Аярлыққа құлақ асып тыңдап па ек?!
Жаралғаным рас болса асылдан,
Үш кессең де, кесірткіге бас ұрман!
Табыд Алаш, табыл досым қасымнан!
Жауларыма бас ие алман басынған.
О, боз Далам, жебе сыйла жасыннан!
Жоңғарлардың зәре-құтын қашырған.
Сақпан сыйла, оқ жаудырар тасымнан,
Тасын борат тауларымның ашынған.
Оқ пен оттан мың өліп, мың тірілдім,
Өзегі сол менің өлмес жырымның.
Күйіп кетіп, күлден қайта жаралған,
Қасиетті феникстің бірімін – 
Өйткені мен өлген жоқпын, тірімін!
Кешегі Алаш арыстары қасқайып,
Айтып өткен өлмес Дала жырымын!
Абылаймын басын қосқан Үш Жүздің.
Ынтымақ пен Бірлікте деп күш біздің!
Төле, Қазыбек, Әйтекенің тілімін,
Бұхар сынды абыздардың жырымын!
Қабанбай мен Бөгенбай Һәм Наурызбай,
Ерлігінің ескірмейтін сырымын.
Өткенімнен алған өлмес тағылым,
Қайнап тұрған мен Қазақтың қанымын,
Ахмет пен Әлиханның, Мағжанның,
Кеудесінде жалындаған жанымын!
Сәкен, Ілияс, Бейімбеттер аңсаған,
Арайлаған Алаштың ақ таңымын!
Шындық іздеп өрге тартқан даңғылмын,
Құрманғазы, Сүйінбайлар жалғасы,
Құланаяң Құлманбетпін, Жамбылмын!

13
Мейірленіп күн иіскеген тұлымын,
Қасиетті Қазақтың бір ұлымын!
Бопсалау мен бодандыққа төзбегем,
Өзімдікі болды енді өз денем.
Тәуелсіздік таңын көрдім көзбенен.
Сол әсерді айту қиын сөзбенен...
Бодандықтың талқан етіп қамытын,
Еркіндікке жетті қазақ көздеген.
Өтеуіне осы айтқанның  бәрінің,
Бостандықты баянды еткей Тәңірім!
Нұрсұлтандай дана ұлдар басқарып,
Нұрлы Әлем қазағымды дос танып,
Білімменен ғарышқа асып санамыз,
Жаңа Ғасыр жырын шырқап Даламыз,
Болашаққа жортып кетіп барамыз!
IV
Ұлылардың мекені, Аңыз-далам,
Төле, Қазыбек, Әйтеке – абыз бабам!
Солардың көмейінен бізге жеткен,
Бірлік әні – өлмейтін нағыз дана ән!
Ерлік жырын маздатқан Бұхар-далам,
Тілмен жауын жаныштап, бұтарлаған.
Абылайдың ақ туын аспандатып,
Көмекей-әулиенің құты арбаған.
Осылайша ұйытып бірлікке елді,
Қансыраған жүрекке тірлік берді.
Пірлер қолдап, әруақ оянған соң,
Тоз-тоз болып дұшпаны дүрліккен-ді.

14
Ақиқатты аңсаған Абай-далам,
«Сөз патшасына» өзіңсіз қалай барам?!
Төбе-төбе, төбе боп жатыр әне,
Дүние үшін таласқан талай надан.
Жырлап жатқан көсіліп Жамбыл-далам,
Күмбірлейді күмбездер сан мыңдаған.
Жүрегімнің қанына қалам малып,
Ғұсни-сырын жанымның жаздым саған.
Рухыңмен жебей гөр ақын ұлды,
Келе жатыр арқаға артып мұңды.
Өзегіңді қақ жарып туғаннан соң,
Көрер дейсің өзіңнен артық кімді.
Көбе бұзар көк сүңгі – қаламымнан,
Қан емес, жыр төгілер сағағынан.
Боз даланы боздатып айлы түнде,
Көкбөріге қосылып саламын ән.
   

15
 ҰЛЫ  ДАЛА  АҚИҚАТЫ
Тұмшалайды ойды түнек дегенің,
Жылт етердей сәуле тапсам деп едім.
Жыр сүйетін жүректер тек сенерім,
Жоқ болса да тоғышарға керегім.
Игіліктің нәрін жинап тереңнен,
Қара түнек қасіретін жеңеммен.
Сартап болып жата-жата архивте,
Даналар мен ойшылдар да көнерген.
Ұлы Дала ақиқаты аңыз боп,
Ертегідей сөнген Еске тамызды от.
Сенбестердің сезімімен қарасаң,
Тарихқа да таңылатын «арыз» көп.
Өткенімді аршып алсам тозаңнан – 
Осы менің көкейімде таза арман.
Ертеңіме алып барсам деп едім,
Шежіремді шаң-қоқыстан тазарған.
Тағдырыма етсем деп ем иелік,
Өзегіне дана Қорқыт-күй еніп.
Анахарсис, Геродоттан басталған,
Дала данышпандарына сүйеніп.
О, Дана ой, сәуле түсір санама,
Сансыз ғасыр өткенімен арада.
Ғарышқа жол салып жатқан ұрпағың,
Өткеніне қарап көзі тала ма?!

16
Соғысса да қызыл қанға малшына,
Бейбіт күнде айналатын малшыға.
Дәстүрге бай, салауатты салты бар,
Ұлы халық Массагет те, Парсы да.
Билеушінің соғамын деп сойылын,
Толтырам деп тоғышардың тойымын.
«Шахматтың тақтасында» - бейбіт ел,
Құрбаны боп қырылды арам «ойынның».
Билеушілер ел қанымен семірген,
Арзан атақ, даңқтан шет не білген?
Зұлқарнайын алғанымен әлемді,
Бір-ақ уыс топырақтан жеңілген...
Ұлы Дала ақиқаты осындай,
Әр-бір күні болғанымен тосын жәй.
Уақыттың тылсымына көмілген,
Тарих жыры тот баспайтын  асылдай.
Ашып қалсаң жарқырайды шағылып,
Өзегінде бар қасірет, бар үміт.
Арыстандай арпалысқан батырлар,
Топырақты жатыр үнсіз жамылып.
      

17
СЫРЫМДЫ  АЙТАМ...
Ей, тағдырым, мынау әлем не дейді?
Назарын сап менсінгісі келмейді.
Қарамаса, мен оларды қаратам,
Жырларымды сары жебедей боратам.
Сенбегенді иландырам, көндірем,
Селебе жыр жүрегіне төндірем.
Тайбурылдай өршеленіп, өрлеймін,
Қазған орын жыра құрлы көрмеймін.
Жігерімді қалқан қылып арыма,
Сырымды айтам Елім саған жарыла.
Нарқы  қымбат намысыңды қорғаймын,
Қыраның боп көк жүзінде самағаймын.
Туған жердің топырағынан нәр алам,
Қас  жауыңа  қанжарың боп қадалам!
Ей тағдырым, ашам солай жолымды,
Мойындатам бағым түгіл, сорымды.
Керек болса тау қопарып, тас жарам,
Тас бұлақтан өлең болып басталам.
Байқағысы келмегенге байқалам,
Аруларға гүлзар болып жайқалам.
Қарттарыма жастық болып жастаған,
Сақалына тамған тамшы жас болам.
Мейірім нұры әжімінде ойнаған,
Әжелердің ұршығы боп айналам...
О, тағдырым, сен білесің мұңымды,
Мұңымды да, айтылмаған сырымды.
Бүгін мені менсінбеген пенденің,
Ұрпақтары жатқа оқиды жырымды.

18
ЖЕР – АНАМ
Тал бесікте таңменен тербетіле,
Келген екем «іңгәлап» жер бетіне.
Содан бергі қызығым-шыжығыммен,
Жүрегі кең Жер-Анам, сенде өтуде.
Өзіңе аян Өмірге талпынғаным,
Шуағыңа шомылып, ән тыңдадым.
Көз арбады күміс пен алтындарың,
Нарқы қымбат алтыннан 
                                     халқым барын – 
Жүрегіммен, жаныммен сезіп өстім,
Қаңбағың боп қырқаңды  кезіп өстім. 
Жанартаудай жалынды намыс бердің,
Намыстансам көрінбес көзіме ешкім!
Жүрегі кең Жер-Анам, қасиеттім,
Сұлулыққа мәңгілік ғашық еттің.
Өзен-көлің... Тауларың...
                                          бәрін-бәрін,
Көкірегіме келеді басып  өпкім.
Күлімдеген бір болып гүліңменен,
Мұңыңменен бөліссем, сырыңменен.
Адам салған жаныңның көп жарасын,
Емдесем деп келемін жырымменен.

19
        
ҮМІТ  ПЕН  КҮДІК
Бәсіре еттім о бастан жанымды арға,
(бұйырта гөр жұртыма барымды Алла!)
Дала жырын ғасырға тәбәрік қып,
Шашу етіп шашамын жаным барда!
Сүйеу етіп сүрінсем Пір-Құтыңды,
Үйренгемін сұңғыла сыр күтуді.
Сары Далам, сағыныш-мұңым болдың,
Төрт құбыла түйіссе – бір бүтін-ді.
Бүтін болсын жырың да, сырың далам,
Талай дұшпан қол сұғып жырымдаған.
Көк бөрідей ұлыған көкке қарап,
Бесік жыры секілді мұңың маған.
Қырқалардан гүл теріп қаласа кім,
Еске алуға құқылы бала шағын.
Құлан еді ұрпағың... Жылан болып,
баратқандай қинайды болашағың.
Тұманданып, белгісіз халың-мұнар,
Жан қалды ма, құдай-ау,
                                       жаныңды ұғар?
Табыс қуып талтаңдап жүргендердің,
Көксегені тәңірге мәлім шығар?!
Күдігі көп ақынды жүдетті арман,
Жыр жазатын шапағат тілеп таңнан.
Түлкібұлаң дүние, түңілдірме,
Жатқандай боп 
                      дайындап түнекті алдан

20
ШАБЫТ  ТАҢЫ
Тіршіліктің қол үзбей күйбеңінен,
Ой өрбітіп көңілге түйгенімнен.
Таң шапағын қондырып жанарыма,
Ораламын шабытты күйге кілең.
Ал, содан соң, жортамын күлік мініп,
Жұмыр жерді қиялмен біріктіріп.
Шайқасамын жамандық атаулымен,
Жүрегімде ізгілік тұнып тұрып.
Көре алмастар көз сүзіп «аһ» ұрады,
Қызғаныш ит қыңсылап жатыр әлі.
Ал, ақынды аялап ақ қанатты,
Поэзия-періште шақырады.
Жұмақ нұры ескендей қанатынан,
Жылу алып жүректің жан-отынан.
Қу тірліктің күйбеңін лақтырып сап,
Ақын отыр сәбидей жаңа туған.
Сырын шертсе Әлемге жүрегінің,
Адам үшін құдайдан тілері – күң!
Періштеге айналып бара жатыр,
Бір қанаты сағыныш, біреуі мұң...
Жерге қонып жұлдыздай самала мың,
Таратқанда өмірге таң алауын.
Бақытымды басқамен бөлісуге,
Күлік мініп Ғарыштан ораламын.

21
МЕН  СЕЗЕМІН...
Мен сеземін,
Бар әлемге нұр боп тарап шапағы,
Ертең менің бұла таңым атады.
Абыз далам ақтарып ақ батаны,
Бақ жолына бастап бара жатады.
Мен сеземін,
Оңнан туып сүмбіледе жұлдызым,
Жырға бөлеп
                     туған жердің шың-құзын,
Мұзбалақ боп қалықтаймын мұз тауда,
Қара шашты құшаққа алып түн қызын.
Мен сеземін,
Қиялыммен тү-у-у Ғарышты кеземін,
Көре алмастан, көз жетпеске беземін.
Қызғаныштың қызыл иті қыңсылап,
Қызыл жалын өртейтінін өзегін.
Мен сеземін,
Өрге сүйреп өрт ішінен өлеңім,
Шыңға алып шығарына сенемін!
Поэзия пырағына ер салып,
Жыр садағын толғай тартып өлемін.
Ал, содан соң...
Жыр сүйетін жұрттың қалып есінде,
Жиналамын Ғарыш жаққа көшуге.
Жер-Анамның  ақ білегін жастанып,
Дамылдаймын сайын Дала төсінде...

22
СЕРТ
О, туған ел, керегімді сайлаған,
Тұғырыңа кіндігімнен байланам.
Сенен қымбат емес күн де, жұлдыз да,
Сенен қымбат емес көкте ай маған!
Ес кіргеннен ерлігіңе сүйсініп,
Өсіп едім нарқыңды ұғып, түйсініп.
Шыныменен сенен туған ұл болсам,
Езілмеймін қиындыққа күрсініп.
Еңбек етем, тауды қолмен қашаймын,
Арманыма жетпей неге босаймын!
Мәңгілік Ел ұрпағы екем, ендеше,
Бақытымды өз қолыммен жасаймын!
Сені көрген жатжұрттықтар сүйінсін,
Кердең басы кекіреймей иілсін.
Нарқы қымбат намысыңа шаң жұқпай,
Дос қуанып, дұшпандарың күйінсін!
Игілікті білігіме жаратам,
Біліміммен жұртты аузыма қаратам.
Сұлтан емес, ұлтаның боп жүрсем де,
Мен сен үшін жаралғанмын жан-Отан!
            

23
... ҚАЛАР МА?!
Оралғанда құйын-дауыл ақпа жыр,
Қаңбағың боп домалаймын тап қазір.
Қиял құсы бағыт сілтеп аспаннан,
Дейді, сонау гүлзар көркем баққа жүр.
Бақта бұлбұл тамылжытып ән-күйін,
Күйге еріп, қоғасындай балқиын.
Рахат бір сезім баурап шалқиын,
Рахатқа батып барам... Қалғиын...
Жо-оқ, қалғыман!
                       Ақпа жырым қайдасың?
Құйын-дауыл
                     жан-дүниемді шайқасын!
Рахатқа елтуге әлі ертерек,
Қыран-түйсік қияға өрлеп  байқасын.
Көрінбейді Ел қайғысы етектен,
Сәйгүлікті босат енді жетектен!
Қасірет боп қара дауыл соққанда,
Қара емен боп,
                          қарсы тұрып төтеп пе ең!
Еліңді аршып алам десең күйіктен,
Қара сонау қыран ұшар биіктен.
Мәстектер мен жайылып жүр жабылар,
Дүлдүл қайда шабысымен сүйінткен?

24
Суат қорып шайнасады жабылар,
Шұрқырасқан мәстектері тағы бар.
Нағыз тұлпар тұяғынан от шашып,
Шықпаған соң жабы-мәстек қағынар.
Кие-далам, күнің қарап соларға,
Құшағыңа құрт-құмырсқа толар ма?
Жо-о, болмаса, 
                     құлан жортып жоныңда,
Күліктердің мекені боп қалар ма?!

25
БҰЛБҰЛДЫҢ  КҮНІ...
Тобыр дүние, 
                    дәргейіңнен қашсам ба?
«Мыңқ» етпейсің, 
                  жан сырымды ашсам да.
Қылышыңа, 
                        төнген қызыл тіліме,
Былқ етпейсің, 
                     мойынымды тоссам да.
Сол емес пе, 
                      бар қазынам, асылым,
Онсыз құны 
               көк жармақ қой басымның.
Қырық жамау шекпеніңді көргенде,
Қайран тілім, 
                      қайыстым сан, жасыдым.
Қайыстым көп,
                           қабырғама қан қатып,
Шешуі жоқ түйін жанға сан батып.
Өрісіңе өзге тілдер лап қойды,
Жуық маңда босатпасын аңдатып.
Сан тозаққа өртенсең де...
                                                   өтіп ең,
Бүгін таңға құр сүлдерің жетіп ең...
Көсегеңді көгертсем деп тамшыдай,
Әкім емес, 
                            ақын болып кетіп ем.

26
Тобыр дүние, 
                           қалай тілсіз толайын,
Шүлдірлеумен қайда барып оңайын?
Асылыңды арамдауды ойлаған,
Міскіндерге толып кетті маңайым.
Айыра алмай сөздерінен кімді-кім,
Сәбилер жүр жат тіл кескен кіндігін...
Ертеңіңе есім кетіп қараймын,
Тотыдайын торға түскен бұлбұлым.

27
    ДАЛАММЕН  СЫРЛАСУ
Арман далам, абыз далам, паң далам.
Сағымыңмын құладүзді шарлаған.
«Отыз жеті кереметтің» ішіннен,
Ойланбай-ақ, мен өзіңді таңдағам.
Жон арқаңда талай жүйірік көсілді,
Көсілді де тағдырлары шешілді.
Сырт қарасаң, көзге қораш көрінген,
Құлагермін дүбірлеткен төсіңді.
Бабаларым берген мұра-байлықтай,
Қалап алғам жан-жүрегім шайлықпай.
Құлагердей құшағыңнан табылам,
«Батыраштың» балтасынан қаймықпай.
Қызғаныштан күйсін, мейлі өртенсін,
Сен мен үшін бәрінен де көркемсің.
Ерменің мен жусаныңның исімен,
Өзегіме өлмес қуат бергенсің.
Мен ұлыңмын сол исіңнен нәр алған,
Топырағыңның түйірінен жаралған.
Болашақтың шақырғанда таңы алдан,
Сендегі өткен күндерімнің бәрі арман!
Саған арнап барымды да, нарымды,
Жыр жазамын өзеніңдей арынды.

28
Шырылдаған, үмітіңе ілініп,
Бозторғайым деп білгейсің жанымды.
Ал жүрегім...
Сен деп соққан  жүрегім,
Сен деп жырлап өтетінін білемін.
Тас қияңда қыраның боп самғаған,
Өрлігіңнің белгісі боп жүремін.

29
ӨЛЕҢ  БОП ҚАЛСАМ...
Осынау  жасыл өлкемде,
Қаламын бүгін, ертең де...
Жалғыз-ақ үміт-арманым,
Өлең боп жетсем ертеңге.
Қаламас едім өзгені,
Арман боп жастық кездегі.
Өлең боп жетсем ертеңге,
Сағыныш болып көздегі.
Ілесіп ерке сағымға,
Арайлап атқан таңымда.
Мұң толы, тәтті сыр толы,
Өлең боп қалсам жадыңда,
Қиялға қанат жалғасам,
Бақ құсы болып самғасам.
Болашақ, нұрлы болашақ,
Өзіңе өлең арнасам!
Күндерім келер...
                         күте алсаң,
Таусылмас тағы құт алсам.
Жүректе мәңгі өшпейтін,
Махаббат болып тұтансам.
Сағым боп самғап даламда,
Төгілсем нұр боп адамға.
Армансыз өттім дер едім,
Өлең боп қалсам санаңда.

30
СЕКСЕУІЛ
Сексеуілдер, құмдауыт топырағың,
Мекендепсің шөлейіт атырабын.
Жаз жайлауда жүрсем де,
                                        күз күзеуде,
қамыңды ойлап өзіңнің отырамын.
Қызық керек қайда да мына бізге,
Аңшы итімнің көңілі тұрады ізде...
Қарсақ, қоян, түлкіге пана болып,
Қарауытып тұрасың құладүзде.
Секілдісің сексеуіл, сертке берік,
Туған жерден безбейсің текке жеріп.
Жер киесін ұқпайтын ебелектер,
Тәубасына түссе екен сені көріп.
Ыстыққа да, суыққа төзімдісің,
Хас батырға балаймын өзіңді шын.
Беріктігің басқаға ой салсын деп,
жаратқан ба, Жаратқан төзім үшін?!
Арса-арса тұлғаңнан сыр аламын,
Сұлулықты құдайдан сұрамадың.
Саған қарап сексеуіл, әлде қалай,
Төзімсіздік жасауға ұяламын.

31
              
СӨЗ КӨШІНІҢ  ҚАРА  НАРЫ