Қаракөлше, шапшынай– қаракөл қойының іш тастауынан (буаздығының 120-140 күндігінде) немесе саулықтың жатырынан жарып алынған, жүні тықыр әрі жылтыр, бұйрасы құлпырған әдемі, үлкен сұранысқа ие терілердің бірі, жарғақ.
Мираз– көк түсті қаракөл елтірісі.
Былғары – өндірістік технология бойынша өңделген тері.
Шегірен – ешкі, қой терісінен жасалған, бетінде бұдыры бар жұмсақ былғары.
Сапиян– ешкі терісінен жасалған ең жоғары бағалы былғары.
Сүрік – ең жоғарғы сапалы жұмсақ былғары.
Күлше – өрнектелген былғары.
Көксауыр – сауыр терісінен иленген, беті бұжыр-көк бояуға боялған сәндік былғары.
Әміркен– жылтыр, әдемі былғары.
Шабыра – ешкі терісінен жасалған жұмсақ былғары.
АСЫҚ АТАУЛАРЫ Асық – төрт түлік мал мен қоңыр аңдар (арқар, құлжа, таутеке, т.б.) тілерсегіндегі буынға біткен топса сүйек.
Асық түрлері: Қоймек– қойдың асығы.
Сақа – асықтың үлкенінен, салмақтысынан, кетілмеген тұтасынан іріктелген ойынның бас құралы.
Құлжа сақа – арқар асығынан жасалған сақа.
Топай– сиыр асығынан жасалған сақа.
Жабайт – қойдың асығы.
Шүкейт (үшкейт) – лақтың кішкентай асығы.
Шүкімейт – жас қозының асығы.
Кеней – шүкейттің көп пайдаланылғанынан мүжілген түрі.
Жабай – салмақты үлкен сақа.
Қорғашбай сақа – табан жағын молырақ ойып қорғасын құйған сақа.
Көктабан – тәйкі жағына қорғасын құйған салмақты сақа.
Қызасық – жіліншіктің бақаймен жалғас сүйегі, тобық, одан дойбы тасы жасалады.
Оңқай асық– қолға ұстағанда тәйкі жағы басбармаққа, алшы жағы сұқ саусаққа дәл келіп, шіге жағы алақанның аясына, бүге жағы сыртына қараған асық.
Солақай асық – қолға ұстағанда алшы жағы басбармаққа, тәйкі жағы сұқ саусаққа, бүгесі қолдың сыртына, шігесі алақанға қараған асық.
