Әждар (Әздер) қожа, Темірқожа

Саяқып бабамыздың бәйбішесінен туған жеті ұлының ішінде Әждар (Әздер) қожа мен Темір қожалардың есімдері аталып өтеді кейбір дерек-мәліметтерде, бірақ ары қарай тиянақты деректер әзірге менің қолымда жоқ болғандықтан ештеме жаза алмадым. Болжам бойынша бұл аталарымыздан ұрпақтардың жоқ болуына байланысты тарих сахнасынан шығып қалған сияқты.

Осыған ұқсас Қылыш атамыздың жағдайы да, тек Тұрсын Жұртбаев пен Бекен Исабаев ағаларымыздың еңбектерінде: «Саяқып қожаның балалары Бердіқожа, Төлеген, Қылыш қожалар Орда тауы мен Архат жерлерінде қоныстанған» - деген деректерді келтіреді. Бұның ішінде Төлеген мен Бердіқожа ұрпақтарының шежіресі осы кітапта қолда бар деректер көлемінде жазылады. Ал Қылыш атамыз туралы мардымды деректер жоқ. Бір анық нәрсе - бұл атамыз Саяқып бабамыздың екінші әйелінен Төлеген мен Бердіқожалармен бірге бір әке-шешеден туған туысы, інісі болып табылады. Мөлшері, бұл атамыздан да ұрпақ қалмаған болуы керек. Бірақ, бұның анық-қанығын анықтау, Қылыш қожаның шежіресін жазуды алдағы уақыттың еншісіне қалдыра тұруға мәжбүрмін. Қолға қандай да бір деректер түскендей болса, Аллаһ өмір беріп жатса, бұл аталарымыздың шежіресін ары қарай жалғастырып көрермін деген ойдамын.