Мотивациялык-баалуулук компонент: жаш муундарда адептүүлүктүн асыл сапаттарын калыптандыруунун социалдык маанилүүлүгүн жана инсанды калыптандыруудагы кыргыз элдик оозеки чыгармаларынын рухий-адептик жаратуучулук ролун терең түшүнүү; кыргыз элдик оозеки чыгармаларына, анын адептик баалуулуктарына жана анын таланттарына урматтоо менен мамиле жасоо; элдин прогрессивдүү тарбиялоо салттары, элдик оозеки чыгармалар менен иштөөдөн жана алар аркылуу окуучуларга адептик тарбия берүүдөн канааттануу.
Мазмундук компонент: өз элинин жана башка этностордун этномаданий, этнопедагогикалык баалуулуктарын туура түшүнүүгө, баалоого жана педагогикалык ишмердүүлүктө колдонууга мүмкүндүк берүүчү азыркы мезгилдеги илимий методологиялык билимдерге ээ болуу; окуучуларга адептик тарбия берүүнү өркүндөтүү максатында кыргыз элдик оозеки чыгармаларынын түрдүү каражаттарын тандап алуунун критерийлерин билүү, моралдык-этикалык баа бере алуу жана алардын педагогикалык баалуулуктарын аныктай алуу; кыргыз элдик оозеки чыгармаларынын негизинде V-VII класстардын окуучуларына адептик тарбия берүүнүн максатын, милдеттерин терең түшүнүү жана аны ишке ашыруудагы окуу материалынын жана класстан тышкаркы жумуштардын мүмкүнчүлүктөрү жөнүндө жалпы түшүнүктөргө ээ болуу;
