Туынды сөз атаулы тілдің сөзжасам жүйесі арқылы жасалады. Ол тілдің сөзжасам заңдылықтары бойынша, тілде қалыптасқан сөзжасам тәсілдерінің бірі арқылы, тілдегі дайын сөзжасам үлгілері бойынша жасалады. Сондықтан туынды сөзді оның қандай тәсіл, қай үлгі арқылы жасалып тұрғанына қарап та ажыратуға болады. Мысалы: малшы, аңшы, өлеңші т.б. Бұл үлгі тіліміздің морфологиялық сөзжасамының түбір – жұрнақ /т+ж/ үлгісі. Ол өте кең тараған үлгі. Сондықтан жоғарыда келтірілген мысалдардың осы үлгі бойынша жасалғанына қарап-ақ, олардың туынды сөз екенін ажыратуға болады.
