Түбір сөздің лексикалық мағынасы болғандықтан, ол туынды сөздің лексикалық мағынасына арқау бола алады. Мысалға дәрісхана деген туынды түбірді алсақ, оның мағынасы дәріс сөзінің мағынасының негізінде жасалғандықтан, дәрісхана – дәріс беретін бөлмені білдіріп тұр. Бұдан туынды сөздің мағынасы оның жасалуына негіз болған түбір сөздің лексикалық мағынасы арқылы жасалғаны анық көрінеді.
Түбір сөздер тілдегі лексикалық нұсқалар (единицалар) болып табылады, сондықтан олар – тілдің сөздік құрамына жатады, тілдің сөз байлығын құрайды. Түбір сөз атаулының бәрі де дайын сөз болып саналады. Олар сөйлемге сол тілдегі дайын қалпында алынып қолданылады. Олар сөйлем жасаумен бірге жасалып отыратын тілдік құбылыс емес. Түбір сөздер тілдегі дайын тілдік нұсқалар болғандықтан, түрлі сөздіктерден орын алады. Басқаша айтқанда, тұрақты дыбыстық құрамда тұрып, белгілі лексикалық мағынаны білдіретін сөз атаулының тұлғалық ерекшелігіне қатыссыз жалпы аты ретінде түбір сөздер деген термин қолданылып отыр.
