2. Мектеп математика курсындағы сан ұғымы. Сан – математика ғылымының, сонымен қатар мектеп математика курсының да ең негiзгi ұғымдарының бiрi. Сан ұғымы мектептiң бiрiншi сыныбынан бастап, соңғы сыныпқа дейiн үзбей оқытылатын және қолданылатын бiрден бiр ұғым.
Бүкiл мектеп математика курсын оқыту барысында «Сан» дегенiмiз не? - деген сұраққа жеткiлiктi негiзделген жауап беру мүмкiн емес. «Сан» терминi мектеп математика курсындағы сан ұғымының кеңеюiне байланысты қарастырылатын сандар жиынының кез келген элементiн бiлдiредi. Мысалы, бастауыш сынып оқушылары үшiн «сан» терминi натурал сан мен нөл, ал бесiншi сынып оқушылары үшiн сан атауы – натурал сан, нөл, жай бөлшек, ондық бөлшек, алтыншы сыныпта – рационал, одан әрi қарай – нақты сандар түсiнiледi.
Мектепте бүтiн, рационал, нақты сандарға анықтама натурал сан ұғымына негiзделiп берiледi. Натурал сан ұғымының өзiне анықтама тұжырымдалмайды‚ оған тек түсiнiктеме ғана берiледi.
Мектеп математика курсындағы сандар жүйесiн кеңейтудiң мүмкiн болатын нұсқаларын қарастырайық:
1. Алдымен натурал сандар, одан кейiн ретiмен оң жай бөлшектер және ондық бөлшектер, терiс сандар, рационал сандар, нақты сандар оқып-үйренiледi. ХХ ғасырдың жетпiсiншi жылдарына дейiн сандар жүйесi осы ретпен оқытылды. Қазiргi кезде біздегі мектеп бағдарламасы да осы реттi сақтайды.
2. Натурал саннан кейiн, бiрден ондық бөлшектердiоқытуға көшудi жүзеге асыру көзделедi (Бiрақ ондық бөлшек тақырыбына көшуден бұрын, жай бөлшек ұғымы және бөлiмдерi бiрдей бөлшектердi қосу және азайту амалдары қарастырылып, ондық бөлшек ұғымын енгiзуге алдын ала дайындық жұмысы жүргiзiледi). Одан кейiн терiс сандар, барлық рационал сандар жиынына амалдар қолдану оқып-үйренiледi.
Сандар жүйесiн бұл ретпен оқыту өткен ғасырдың жетпiсiншi жылдарынан бастап енгiзiлген.
3. Натурал сандармен қысқаша таныстырылғаннан кейiн оған қарама-қарсы сандар енгiзiледi, яғни бiртiндеп «екi жаққа қарай кеңейетiн» шектеулi бүтiн сандар жиыны оқытылады. Мысалы, алдымен –10 мен +10 аралығы, кейiн –100 бен +100 аралығы т.с. жалғаса бередi де, соңында бүтiн сандардың шектеусiз екендiгi айтылады. Бүтiн сандарды оқыту барысында оқушылар жай бөлшектердi де оқып-үйрене бастайды, бiрақ бүтiн сандар жиынын түпкiлiктi құрып болғаннан кейiн ғана, рационал сандар жиынын құруға көшедi. Сандық жүйенi мұндай ретпен оқыту логикалық жүйеге жақын болғанымен, мектеп практикасында кең таралмаған.
Мектепте сандық жүйенi құру, және оларды оқыту оқу бағдарламаларының мазмұнына, оқушылардың жас ерекшелiктерiн ескеруге байланысты болады.
