тарау. Денсаулық сақтаудың медициналық-теориялық және құқықтық негіздері

Денсаулық сақтау дегеніміз – мемлекеттік медицина ұйымдарының тұрғындардың денсаулығын сақтау және күшейту үшін жүзеге асыратын медициналық (емдеу-профилактикалық және реабилитациялық) шаралар жүйесі болып табылады.

Көпшілік мамандар «денсаулық сақтау» мен медицина деген сөздердің мағанасын бірдей деп есептейді. Себебі осы екі сөздің мағанасы да тұрғындардың денсаулығы мен ауруларына байланысты білім мен тәжірибелік жұмыстарды қамтиды. «Денсаулық сақтау» деген түсінік топтық және әлеуметтік деңгейде қолданылады. Сондықтан денсаулық сақтау медицинаның қоғамдық, әлеуметтік қызметі деп қарастыруға болады.

Денсаулық сақтау жүйесі адамзаттың дамуына тікелей байланысты үдеріс және оның даму деңгейінің бір көрінісі ретінде қарастырылады. Қоғам немесе мемлекет ерте дәуірден-ақ денсаулық сақтау қызметін заңды жолға қоюға күш салды. Алайда ХVI ғасырға дейін медицина ісі орталық мемлекет билігінің заңды басқару элементіне айналған жоқ. Медицина мен денсаулық сақтау саласы қазіргі таңда маңызды ғылыми және тәжірибелік бағыт ретінде қалыптасып отыр.

Денсаулық сақтау саласының және медицинаның негізгі міндеті әлеуметтік ортаның адам денсаулығына тигізетін зиянды әсерлерін кешенді түрде зерттеп, оның алдын алуға бағытталған тиімді шараларды ғылыми тұрғыда негіздеу және оны тәжірибеге енгізіп, тұрғындардың денсаулығын сақтаудың стратегиясы мен тактикасы жасау деп қарастыру қажет.