Дипломдық жұмыстардың тақырыптамасына талаптар

Студенттің диплом жұмысының тақырыбын таңдауы өте маңызды, өйткені тақырыпты және зерттеу нысанын дұрыс таңдау оның нәтижелі орындалуын қамтамасыз етеді.

Дипломдық жұмыстың тақырыптамасы бітіртуші кафедрамен жасалынады және кафедра мәжілісінде бекітіледі.

Қазақстан Республикасының жоғары оқу орындарының түлектерін қорытынды мемлекеттік аттестациялау туралы ережеде студентке дипломдық жұмыстың тақырыбын таңдау құқығы берілген. Көрсетілген тақырып тізімінен студент дипломдық жұмыстың тақырыбын таңдайды, сонымен қатар әзірлеуде оның тиімділігін негіздей отырып, өзінің тақырыбын ұсынуға құқығы бар.

Нақты экономикалық және инновациялық мәселелерді шешуге дипломдық жұмысты бағдарлау студенттердің дербестігі мен белсенділігін дамытудың маңызды түрі болып саналады.

Аймақтың дамуының әлеуметтік-экономикалық мәселелеріне арналған тақырыптар да дипломдық жұмыс жасау тәжірибесінде бар.

Дипломдық жұмыстың тақырыбын таңдаудың негізгі өлшемі студенттің ғылыми және тәжірибелік қызығушылығы болып танылады. Бұл, ең алдымен, көп уақыт бойы белгілі бір тақырып бойынша материалдар жинаған, ғылыми студенттік конференцияларға қатысқан студентке қатысты. Дипломдық жұмыстың тақырыбын таңдағанда, студент қандай тақырып бойынша қаншалықты толық материалдар жинайтынын, кәсіпорынның тәжірибелік жұмысын толығымен пайдалана алатынын ескеруі керек болады.

Тәжірибемен оқытудың байланысын арттыру мақсатында «Экономика» кафедрасы студенттерге нақты тапсырыс бойынша дипломдық жұмысты орындауды ұсынады, яғни ұйым мен кәсіпорынның тапсырысы бойынша тақырып орындалады.

Ұйым мен кәсіпорын өзінің қажеттілігін ескере отырып, оқу орындарына студенттермен орындалатын дипломдық жұмыстың кейбір тақырыбын әзірлеуге тапсырыс береді.

Дипломдық жұмыс ретінде нақты тақырыпты әзірлеуге тапсырысты кәсіпорын басшысы кез-келген меншік иесімен келісім-шарт есебінде рәсімдеуі мүмкін немесе тиісті оқу орнына хат арқылы жіберуі мүмкін.

Кафедраның ұсынысы бойынша дипломдық жұмыстың тақырыбы студенттің атына бекітіледі, ол диплом қорғау алдындағы іс-тәжірибеге кетер алдында жоғары оқу орнының ректоры бұйрығымен рәсімделенеді.