С а х а р а з а ф е р м е н т і н д а й ы н д а у. Стаканға 10 мл дистильденген суды өлшеп алып, фарфор келісіндегі 1 г ашытқыға оны аз-аздан қоса отырып езеді де, судың қалғанын түгелдей келіге құйып, қоспаны араластырады. Қоспа құрамында сахараза ферменті болады. Оны пайдаланудың 2 жолы бар:
1. Тұнба толық шөккен соң оның бетіндегі ерітіндіні сахараза ферменті ретінде пайдалануға болады.
2. Қоспаны сүзгі қағазы арқылы өткізеді де, сүзгі арқылы өткен сұйықты фермент ретінде пайдаланады.
Жұмыстың орындалу барысы:
Штативке нөмірленген 4 пробирка (1, 2, 3, 4) қойып, әрқайсысына 2 мл-ден 1 %-тік сахароза ерітіндісін құяды. Бірінші және екінші пробиркаларды 38ºС температурада 10 минут ұстайды. Үшінші пробирканы мұзға, ал төртінші пробирканы қайнап тұрған суға қойып, бұларды да 10 минут ұстайды. Бесінші пробиркаға 1 мл сахараза ферментін құйып, қайнағанға дейін қыздырады немесе қайнап тұрған суда 8-10 минут ұстайды. Осыдан кейін 1, 3, 4-ші пробиркаларға ашытқыдан бөліп алынған сахараза ферментін (нативті), ал 2-ші пробиркаға қайнатылған фермент ерітіндісінен 1 мл құяды да, барлық пробиркаларды бөлме температурасында 7-10 минут ұстайды. Соңында пробиркаларға 1 мл-ден Фелинг реактивін құйып, 10-15 минуттан кейін барлық пробиркалардағы Фелинг реакциясының нәтижесін қорытындылайды.
