2.2 Оқыту тәжірибесінің мазмұны мен нәтижесі Анықтау тәжірибесінің нәтижелерін қорытындылай отырып, біз оқыту тәжірибесінің әдістемесін өңдеп жасадық. Оқыту тәжірибесі кестеге сәйкес, нақты айтқанда анықтау тәжірибесінен кейін 1 ақпаннан бастап – 18 сәуірге дейін жүргізілді. Оған анықтау тәжірибесі кезінде тексерілген ІІ деңгейде жалпы сөйлеу тілі дамымаған балалар 8-9 жастағы 20 бала қатысты. Әдістемені өңдеп жасау барысында ІІ деңгейде жалпы сөйлеу тілі дамымаған 8-9 жастағы балалардың сөйлеу тіл ерекшеліктері, психикалық процестерінің өзгешелігі ескерілген болатын.
Оқыту тәжірибесінің мақсаты: ІІ деңгейде жалпы сөйлеу тілі дамымаған балалардың грамматикалық сөйлеу тілін, байланыстырып сөйлеуін, дыбыс айтуын, фонематикалық естуін дамыту және сөздік қорын молайту.
Оқыту тәжірибесінің міндеттері: 1) ІІ деңгейде жалпы сөйлеу тілі дамымаған балалардың сөздік қорын түрлі тапсырмалар арқылы дамыту;
2) іріктелген тапсырмалардың (әдістемелік жұмыстардың) түзете-дамыту жұмысын жетілдіруге деген ықпалын дәлелдеу.
Оқыту тәжірибесінің мазмұны:тәжірибеге қатысушы балаларды түзете-дамыту жұмысын жетілдіру үшін олармен оқыту және тәрбиелеу, түзету жұмысын ұйымдастырудың негізгі қағидалары ұсынылады:
Бұзылысты жоюдағы жүйелілік қағидасы. Құрылымдық компоненттері тығыз байланысты сөйлеу тілі күрделі функционалды жүйе деген түсінікке сүйенеді. Логопедиялық жұмыста ақаулықтың құрылымын, алғашқы бұзылысты, біріншілік және екіншілік бұзылыстардың өзара қатысын белгілеуді көздейді. Осыған сай сөйлеу тілі кемістігін түзету функционалды сөйлеу жүйесінің барлық жағына (лексикалық, грамматикалық, фонетикалық) әсер етуді көздейді. Аталмыш қағида түзете-дамыту әрекетінің нәтижесін болжауға мүмкіндік береді.
